472. மும்பை பயங்கரம் - கோர்வையில்லா எண்ணங்கள்

நேற்றிரவில் ஆரம்பித்த (தற்கொலைப்படை)தீவிரவாதத் தாக்குதல் இன்னும் முடிவுக்கு வரவில்லை. ஹோட்டல்கள், ரயில் நிலையம், மருத்துவமனை, களிப்பிடம் என்று கிட்டத்தட்ட பத்து இடங்களில் ஒரே நேரத்தில் ஒரு ராணுவ படையெடுப்புக்கு இணையான திட்டம் தீட்டுதலோடு தாக்குதல் நடந்தேறியுள்ளது. கடைசியாக வந்த தகவல்களின்படி தாஜ் ஹோட்டலில் சிக்கியிருந்தவர்கள், கடுமையான துப்பாக்கிச் சண்டையின் முடிவில் மீட்கப்பட்டு விட்டார்கள். ஹோட்டலின் தளங்களில் 40 சடலங்கள் கண்டெடுக்கப்பட்டன. எஞ்சியிருந்த 4 ஃபியாதின் அரக்கர்கள் கமேண்டோக்களின் இறுதித் தாக்குதலில் பலியாயினர். தீவிரவாதிகளை மும்பைக் கரையில் இறக்கி விட்டதாக நம்பப்படும் MV Alpha என்ற வியட்னாமிய கப்பலை, கடற்படை ஹெலிகாப்டர்கள் துரத்திச் சென்றுள்ளதாகவும் ஒரு செய்தி வந்துள்ளது.

இக்கட்டானதொரு தேசியச் சூழலில், பிஜேபி இதை அரசியலாக்காமல் அரசோடு கை கோர்த்துள்ளது ஆறுதல் அளிப்பதாக உள்ளது. பிரதமரும், அத்வானி அவர்களும் ஒன்றாக மும்பை செல்ல இருப்பதாக செய்தி வந்துள்ளது. இந்த நேரத்திலாவது ஒற்றுமை பேணுவதின் அவசியத்தை உணர்ந்துள்ள அரசியல்வாதிகளுக்கு நன்றி. தீவிரவாத ஒழிப்புக் குழுவின் (ATS) தலைவர் ஹேமந்த் கர்காரே, விஜய் சலாஸ்கர், அஷோக் காம்தே ஆகிய தலைசிறந்த போலீஸ் அதிகாரிகள், தீவிரவாதிகளுடனான துப்பாக்கிச் சண்டையில் உயிர் நீத்தது தீவிரவாத எதிர்ப்புக்கு பேரிழப்பு.


இவர்களைப் போன்ற மூத்த அனுபவமிக்க ஆற்றல் மிக்க அதிகாரிகள், ஒன்றைப் புரிந்து கொள்ள வேண்டும். Leading by example என்பது எல்லா நேரங்களிலும் சரியான அணுகுமுறை ஆகாது. இவர்களின் உயிர் மதிப்பற்றது. தீவிரவாத ஒழிப்புக்கு இவர்களின் சீரிய பணி / தலைமைப்பண்பு நாட்டுக்கு மிக மிக அவசியம். அதனால், திட்டம் தீட்டுவதிலும், தங்களது அணி வீரர்களை வழி நடத்துவதிலும், இன்னும் பல அதிகாரிகளை உருவாக்குவதிலும் இவர்கள் பெரும்பங்கு ஆற்ற வேன்டியுள்ள சூழலில், முன் சென்று உயிரிழப்பதால் அவர்களுக்குக் கீழே பணியாற்றுபவர்கள் ஊக்கத்தையும் உற்சாகத்தையும் இழக்கின்றனர்!

காஷ்மீரத்து விடுதலையை முன்வைத்துத் தான் இத்தீவிரவாதிகள் இது போன்ற அக்கிரமச் செயல்களில் ஈடுபடுகிறார்களா என்பது தெளிவாக இல்லை. மும்பைத் தாக்குதலில் லஷ்கரின் கை இருப்பதாக கூறப்படுகிறது. டெக்கான் முஜஹிதீன் என்ற தீ.அமைப்பு இதற்கு பொறுப்பேற்றுள்ளது. இது ஹைதரபாத்திலிருந்து செயல்படுகிறதா ? காஷ்மீரில் ஒரு referendum வைத்து, அதன் அடிப்படையில் காஷ்மீரை பிரித்துக் கொடுக்கும் பட்சத்தில், அங்குள்ள அனைத்துத் தீவிரவாத இயக்கங்களும் இந்தியாவுக்கு எதிரான பயங்கரத் தாக்குதல்களை நிறுத்தி விடுமா ? பதில் தெரியவில்லை!

ஒன்று தெளிவாக உள்ளது. குறிப்பாக அயல்நாட்டினரை குறிவைத்திருப்பதை வைத்துப் பார்த்தால், தீவிரவாதிகளின் நோக்கம், ஒரு தீவிரமான பாதுகாப்பற்ற சூழல் இந்தியாவில் நிலவுகிறது என்ற எண்ணத்தை/அச்சத்தை அயல்நாட்டவர் மனதில் விதைத்து, அவர்களை இங்கே வரவிடாமல்/எந்த முதலீடும் செய்யவிடாமல் விரட்டி அடிப்பது தான். சுற்றுலா, வணிகம்,வர்த்தகம் என்று வேகமாக வளர்ந்து வரும் இந்தியாவை, பொருளாதார அளவில் வீழ்ச்சியடைய வைத்து நாசமாக்குவது தான் தீவிரவாதத்தின் குறிக்கோள். பாகிஸ்தானிய பொதுமக்களுக்கு இம்மாதிரி குறிக்கோள் இல்லாவிட்டாலும், யாருக்கும் கட்டுப்படாத பாகிஸ்தானிய உளவு ஸ்தாபனமான ISI-க்கு எல்லா தீவிரவாதித் தாக்குதல்களிலும் பெரும்பங்கு இருப்பதாகவே தோன்றுகிறது. ISI தனது இந்திய ஒழிப்புப் பணிக்கு காஷ்மீரை trigger-ஆக பயன்படுத்தி, தீவிரவாதத்திற்கு ஆள் பிடிக்கிறது.

தகவல் தொழில்நுட்பத்தில் சிகரம் தொட்டிருக்கிறோம். நிலவுக்கு விண்கலம் அனுப்பியிருக்கிறோம். Defence தொழில்நுட்ப ஆய்வின் மூலம், புதுசு புதுசாக வீரியமுள்ள ஏவுகணைகளை கண்டுபிடித்துள்ளோம். ஏன் தீவிரவாதம் சார்ந்த உளவுத் தகவல் சேகரிப்பதில், தற்காப்பு நடவடிக்கைகளில் கோட்டை விடுகிறோம் ??? இதற்கு அரசு சார்ந்த அமைப்புகளின் அதிகாரிகளையோ காவல் துறையையோ குறை சொல்ல முடியாது. அவர்களிடம் அர்ப்பணிப்பு இல்லை என்று ஒருபோதும் கூற முடியாது. சில கருப்பு ஆடுகள் எங்கேயும் உள்ளன தான். அவர்களுக்கு முழு அதிகாரம் அளித்து, அவர்களை சுதந்திரமாக பணியாற்ற விடுவதில்லை. கேடு கெட்ட அரசியல் தலையீடு எல்லாவற்றையும் குட்டிச்சுவராக்கி விடுகிறது. ஒவ்வொரு மாநிலத்திலும் தீவிரவாத ஒழிப்புக்கென்றே ஒரு அமைப்பை உருவாக்கி, அவற்றுக்கு முழுச் சுதந்திரம் அளித்து, அவை அனைத்தும் ஒருங்கிணைந்து செயல்படுவதே ஒரு நல்ல தொடக்கமாக அமையும்.

இல்லையெனில், இது போன்ற தீவிரவாத அவலங்கள் நிற்காமல் தொடரும். நாமும் 3-4 நாட்கள் பதிவுகளிலும், டிவிட்டரிலும், சீரியஸாக விவாதம் செய்து விட்டு, இரங்கலை தெரிவித்து விட்டு, நமது டிவிட்டுகளில் மறக்காமல் ':-(' குறியைப் போட்டு விட்டு அவற்றை மறந்து விடுவோம், அடுத்த குண்டு வெடிப்பு நிகழும் வரை !!! இப்போதுள்ள சூழலைப் பார்த்தால், நமது எதிர்கால சந்ததியினர் எதிர்கொள்ளவிருப்பதை நினைத்துப் பார்க்கவே பயமாக இருக்கிறது.

இன்னொரு விசயம். நம்மைச் சுற்றி இருக்கும் நாடுகளைப் பாருங்கள். சீனாவை நண்பனாக நினைக்கவே முடியாது, நாம் எவ்வளவு இணக்கமாக இருக்க முனைந்தாலும்! சரியான களவாணி நாடு. பங்களாதேஷ், பாக்கிஸ்தான், இலங்கை, நேபால் என்று எந்நேரமும் சண்டையும் குழப்பமும் நிறைந்த failed states வகையறா.

எ.அ.பாலா

Also read: இட்லிவடைப் பதிவு
நண்பன் ஷாஜியின் பதிவு

471. ஜாதீயத்தில்/அரசியலில் ஊறிய சட்டக்கல்லூரி

சமீபத்தில் அம்பேத்கார் சட்டக்கல்லூரி வளாகத்தில் நடைபெற்ற வன்முறை குறித்து இங்கே நிறைய பேசியாகி விட்டது. சற்றே தாமதமாய் தான் இதை எழுத முடிந்தது.

1. இந்த வன்முறைக்கு அரசியல்வாதிகளும் வழக்குரைஞர்களும் தான் மிக அதிக பொறுப்பேற்க வேண்டும், காவல் துறையை விட. சட்டக்கல்லூரி வளாகத்தை அரசியல் மைதானம் ஆக்கியது இவர்கள் தான். பெரும்பான்மையான வழக்குரைஞர்கள் ஏதாவது அரசியல் கட்சியை சார்ந்தே செயல்படுவதால், இம்மாணவர்கள் படிக்கும் காலத்திலேயே அரசியலின் (உருப்படாத) பால பாடங்களை கற்றுத் தேற கல்லூரி நாட்களை பயன்படுத்துகிறார்கள்.

2. முன்னர் வன்முறையில் ஈடுபட்ட மாணவர்கள் மீது போலீஸ் நடவடிக்கை/கல்லூரி நடவடிக்கை எனும் நிலை வரும்போது அதில் தலையிட்டு சமரசம் என்ற பெயரில் அம்மாணவர்கள் தண்டனையிலிருந்து தப்ப இவர்கள் உதவி செய்ததால், 'கொலையும் செய்வான் மாணவன்' என்ற நிலைக்கு அம்மாணவர்கள் செல்வதில் ஆச்சரியம் ஏதுமில்லை :( அப்படியிருந்தும், சட்டக்கல்லூரி மாணவர் மீது இந்த வருடம் மட்டும் 14 கேசுகள் பதியப்பட்டது !

3. மாணவர்களுக்கு எடுத்துக்காட்டாக இருக்க வேண்டிய வழக்குரைஞர்கள் செய்யும் அராஜகத்தைப் பற்றி பேசாமல் இருப்பதே நலம் !

4. எது எப்படியோ, கடமை, ஒழுக்கம், கட்டுப்பாடு ஆகிய விசயங்களை கடைபிடிக்க வேண்டிய குறைந்தபட்ச அவசியத்தை (தங்கள் காவலர் பயிற்சியில்) அறிவுறுத்தப்பட்ட காவல்துரையினரே ஒரு தீவிரமான குற்றம் தங்கள் முன்னால் நடந்தபோது வாளாவிருந்தது தான், பலருக்கும் கோபத்தையும், அதிர்ச்சியையும் ஏற்படுத்தியது. எனக்கென்னவோ, சட்டசபைக் கூட்டம் நடைபெறும் சமயம், தாங்கள் ஏதாவது நடவடிக்கை எடுக்கப் போக, அது backfire ஆகக்கூடிய அபாயம் இருந்ததாக போலீஸ் எண்ணியிருக்கலாம் என்று தோன்றுகிறது.

5. விடுதியில் இருப்பவர்களில் பெரும்பாலானவர் தலித் மாணவர்கள். விடுதியில் அவர்கள் வைத்தது தான் சட்டம் என்ற நிலை நிலவுவதாக ஒரு புகார் இருப்பினும், தங்கள் கிராமங்களில் அம்மாணவர்களும், அவர்கள் குடும்பங்களும் ஒடுக்கப்பட்ட சூழலில் அனுபவித்த அவமானங்களும் இன்னல்களும் அவர்களை கடினப்படுத்தியிருக்கிறது என்பதை யாரும் மறுக்க முடியாது. இது உளவியல் சார்ந்ததொரு பிரச்சினை.

பெரு நகரத்தில் உள்ள ஒரு கல்லூரியில் கூட, அவர்கள் 'தொடத்தகாதவர்களாக' அவமானத்துக்கு உள்ளாகும்போது, (தேவர் ஜெயந்தி விழா அழைப்பிதழில் அம்பேத்கார் பெயரை விட்டது மட்டுமே காரணமாக இருக்கத் தேவையில்லை, அது ஒரு Trigger, அவ்வளவு தான்!!) அவர்களின் ஆற்றாமையும் கோபமும் collective aggression-க்கு வழிவகுத்து, வன்முறையில் முடிகிறது. அதனால், வன்முறை சரி என்று வாதிடவில்லை! ஆனால், அடிபட்டு மயங்கிச் சாய்ந்த ஒருவனை சிலர் தொடர்ந்து அடித்து உதைத்தார்கள் என்றால், எத்தகைய ஒரு கோபம் உள்ளே ஒரு எரிமலையாக கனன்று கொண்டிருந்திருக்க வேண்டும் என்பதை நினைத்தால் மிக்க அதிர்ச்சியாக இருக்கிறது :( அதோடு, தலித் மாணவர்களை சாதி வெறியர்கள் என்பது நகைமுரண் தவிர வேறில்லை. ஒடுக்கப்பட்டு சமூகக் கட்டமைப்பில் கடைநிலையில் உள்ளவர்களுக்கு எப்படி சாதி சார்ந்த திமிரோ கர்வமோ வெறியோ இருக்க முடியும் ?!?!?!?

பொறுப்பில இருப்பவர்களும் (அரசியல்வாதிகள்) பொறுப்பாக இருக்க வேண்டியவர்களும் (வழக்குரைஞர்கள்) பிரச்சினையை சரியான முறையில் அணுகி, மாணவர்களிடையே சமரசமும், நட்பும், கல்லூரியில் நல்ல சூழலும் நிலவ வழி செய்யாமல் சுயலாபத்துக்காக பிரிவினைக்கு தூபம் போடுவது யாருக்குமே நல்லதல்ல.

6। நல்லவேளை, அடிபட்ட மாணவர் யாரும் உயிரிழக்கவில்லை, பிரச்சினையும் பூதாகாரமாக உருவெடுக்கவில்லை! இது போன்றதொரு சாதீய வன்முறை ஒரு கல்லூரி வளாகத்தில் நிகழ்வது இதுவே கடைசியாக இருக்கட்டும்। தங்கள் ஆற்றலையும், நேரத்தையும் படிப்பில் செலவிட்டு தங்களை வாழ்வில் மேம்படுத்திக் கொள்ள வேண்டிய கட்டாயத்தில் உள்ள மாணவர்கள் தேவையில்லாத அரசியல் தலையீட்டால் உருப்படாமல் போவது மிக்க வருத்தத்திற்கு உரியது। கல்வி ஒன்றே சமூகத்தில் தாங்கள் நல்ல நிலையை அடைய (சமத்துவத்தை பெற) வழி வகுக்கும் என்பதை மற்றவரை விட தலித் மாணவர்கள் உணர்ந்து செயல்பட வேண்டியது மிக அவசியம்.

7. இறுதியாக ஒரு விசயம். எந்த ஒரு பிரச்சினை என்றாலும், அரசுப் பேருந்துகளை உடைத்தும் நாசமாக்கியும் எதிர்ப்பை தெரிவிக்கும் பழக்கத்திற்கு சாவுமணி அடிக்க வேண்டும். மக்கள் வரிப்பணத்திலிருந்து அவை வாங்க்கப்பட்டவை என்பது கூட சிலபல மாணவ மரமண்டைகளுக்கே புரியவில்லை என்றால், பாமரர்களான கட்சித் தொண்டர்களுக்கு எப்படி புரியும் ?!?!? பொதுச்சொத்துக்கு நாசம் விளைவிப்பவர்களுக்கு கடுமையான தண்டனை வழங்க்ப்படும் வகையில் சட்டம் இயற்றப்பட வேண்டும். அது பொடா அளவுக்கு இருந்தால் கூட பரவாயில்லை !!!!

எ.அ.பாலா

470a. வில்லத்தனத்தில் ஒரு சகாப்தம் - மஞ்சேரி நாராயண் நம்பியார்

தமிழ் சினிமாவின் "முதல்" & GRANDEST வில்லன் (நம்மாழ்வரை முதலாழ்வார் என்றழைப்பது போல!) எம்.என்.நம்பியார் இன்று காலமானார்.  அன்னாருக்கு வயது 89.  அவர் இறந்த சேதியை டிவிட்டரில்  வாசித்தவுடன் ஒரு சோகம் தாக்கியது.  என்ன மாதிரி நடிகர், வில்லனாக எம்ஜியார் சிவாஜி, ரவிச்சந்திரன், ஜெய்சங்கர், முத்துராமன், ஜெமினி, கமல்(குரு!), ரஜினி என்று எண்ணிலடங்கா கதாநாயகர்களுக்கு வில்லனாக பல திரைப்படங்களில் பரிமளித்தவர் MN நம்பியார்.  கிட்டத்தட்ட 1000 திரைப்படங்களில் நடித்தவர்.  சபரி மலைக்கு 65 தடவை சென்றதால், மகா குருசாமி என்ற அந்தஸ்த்தைப் பெற்றவர்.  நிஜ வாழ்வில் மகா யோக்கியர், மகா யோகி ! இந்த சேதி கேட்டவுடன் 2 விசயங்கள் சட்டென்று நினைவில் பளீரிட்டது.  பாக்கியராஜின் தூறல் நின்னுப் போச்சு படத்தில் அவரது நடிப்பு செம கலக்கலான நடிப்பும், எம்ஜிஆரிடம் ஒரு மூதாட்டி "ராசா நம்பியாரிடம் ஜாக்கிரதையாய் இருந்துகொள்" என்றதும் (சுரதாவும் இதை டிவிட்டரில் சொன்னார்!!!). ஆழ்ந்த அஞ்சலியும், அவரின் ஆன்மா சாந்தியடைய பிரார்த்தனைகளும் !  ஐயப்பனுக்கு அருகேயே சென்று விட்டார் அவர் ! எ.அ.பாலா

469. அடிச்சுக்கிட்டு சாகட்டும் அப்படியே விடுங்க!

அடிச்சுக்கிட்டு சாகட்டும் அப்படியே விடுங்க!

முதல்வன் ஸ்டைலில் நடந்த நிஜம் ... சட்டக்கல்லூரியில் சிலையான போலீஸ்!

வன்முறையை முதலில் தெளித்தது எந்த சாதி? ரத்தத் தில் அதிகம் குளித்தது எந்த சாதி? இதுவல்ல பிரச்னை! புனிதமான கல்வி வளாகத்தினுள் கத்தியும், இரும்புக் குழாயும், உருட்டுக் கட்டைகளுமாக யுத்தத்தை அரங்கேற்றியிருப்பது, மாணவ சாதி! அதை சிலையாக நின்று வேடிக்கை பார்த்தது, போலீஸ் சாதி! இதுதான், 'இந்த சமூகம் எங்கே போய்க் கொண்டிருக்கிறது?' என்ற கலவரத்தை ஏற்படுத்துகிறது!

சென்னை 'அம்பேத்கர் அரசு சட்டக் கல்லூரி'யில் கடந்த 12-ம் தேதி மாலையில் நடந்த கோர சம்பவம் மீடியாக்களின் வாயிலாக வெளியானதைத் தொடர்ந்து, ஒட்டுமொத்த தமிழகமும் பதைபதைப்பின் பிடியிலிருந்து இன்னமும் மீளாமல் தவிக்கிறது! 'இரண்டு சமூகத்தைச் சேர்ந்த மாணவர்களுக்கு இடையே ஏற்பட்ட மோதல்தான், வெறித்தனமான இந்தத் தாக்குதலுக்கு முக்கிய காரணம்' என்பது பதைபதைப்பைக் கணிசமாகவே கூட்டியிருக்கிறது.

தாக்குலில் படுகாயப்பட்ட பாரதி கண்ணன், ஆறு முகம், அய்யாதுரை ஆகிய மூன்று மாணவர்களும் சென்னை பொது மருத்துவமனையின் அடுத்தடுத்த படுக்கைகளில் அனுமதிக்கப்பட்டிருக்க... நாம் அங்கே விசிட் அடித்தோம்.

சட்டக் கல்லூரியின் நுழைவாயிலில் அடித்துத் துவைக் கப்பட்ட பாரதி கண்ணன் நைந்துபோய்க் கிடந்தார். ஒரு கையை கட்டித் தொங்கப் போட்டிருந்தார்கள். உடலில் காயம் இல்லாத இடமே இல்லை. பேசும் நிலையிலும் அவர் இல்லை. அங்கே இருந்த மாணவர்களிடம் பேசினோம். ''பெயர், போட்டோ போட்டுடாதீங்க...'' என்றபடி பேச ஆரம்பித்தார்கள்.

''பல வருடங்களாகவே சட்டக் கல்லூரியில் சாதி பிரச்னை மாணவர்களை சீரழிச்சுக்கிட்டு இருக்கு. ஹாஸ்டல் மாணவர்களுக்கும் ரெகுலர் மாணவர் களுக்கும் சச்சரவு வராத நாளே கிடையாது. எஸ்.சி. மாணவர்கள், எஸ்.சி. அல்லாத மாணவர்கள் என்று இரண்டு குழுக்களாகத்தான் செயல்படுறாங்க.

நாங்க 'முக்குலத்தோர் மாணவர் பேரவை' என்ற பெயரில் ஒரு அமைப்பைத் தொடங்கி செயல்பட்டுக் கொண்டிருந்தோம். தேவர் ஜெயந்தி அன்று அடிக்கப்பட்ட நோட்டீஸில் கல்லூரியின் பெயரான அம்பேத்கர் பெயரைப் போடவில்லை. சம்பவத்தன்னிக்கு மாலையில் செமஸ்டர் எக்ஸாம் நடந்துகொண்டிருந்த சமயத்தில், சாதி ரீதியான தேசிய கட்சி ஒன்றின் கொடி கட்டிய காரில் ஒரு கும்பல் கல்லூரிக்குள் வந்தது. அவர்கள் கல்லூரிக்குக் கொஞ்சமும் சம்பந்தமில்லாதவர்கள். அவர்கள் அந்தக் கட்சியின் முக்கிய பொறுப்பில் இருக்கும் ஒருவரின் அடியாட்கள். அவர்கள்தான் இத்தனை அராஜகத்தையும் நடத்தினாங்க. அவர்களில் எங்கள் காலேஜ் ஓல்டு ஸ்டூடண்ட்ஸ§ம் இருந்தாங்க.

கல்லூரியின் இன்சார்ஜ் முதல்வரா இருக்கிற ஸ்ரீதேவ், ஏற்கெனவே விடுதியில் வார்டனா இருந்தவர். அவர் அனுமதி கொடுக்காமல் போலீஸ் கல்லூரிக்குள் வரமுடியாது. ஆனால், பிரின்சிபாலோ போலீஸை கூப்பிடவே இல்லை. போலீஸ் உள்ளே வர அவர் அனுமதித்திருந்தால், பிரச்னை இந்த அளவுக்குப் போகாமல் தடுத்திருக்கலாம். போலீஸ் இதில் தலையிடாது என்று தெரிந்தேதான் படிப்படியாகத் திட்டம் போட்டுக் காரியத்தைக் கனகச்சிதமாக அரங்கேற்றியிருக்கிறார்கள்'' என்று சீறினார்கள்.

மருத்துவமனை வார்டுக்கு வெளியே பாதிக்கப்பட்ட கொதிப்பும் சோகமுமாக நின்றிருந்தனர், மாணவர்களின் உறவினர்கள். அவர்களில் ஒரு பெண் அங்கே நின்றிருந்த போலீஸாரைப் பார்த்து, ''டி.வி-யில பாத்துட்டு ரத்தமே கொதிக்குதுய்யா... பாவிங்களா! உங்க பொண்டாட்டி புள்ளைங்கள இப்படி நாயைப் போல அடிச்சா இப்படி வேடிக்கை பாத்துக்கிட்டா இருப்பீங்க? உங்களுக்கு எல்லாம் எதுக்கு காக்கிச் சட்டை? கழற்றி நெருப்புல போடுங்க..!'' என ஆத்திரப்பட... போலீஸ் அதிகாரிகள் முதல் கான்ஸ்டபிள்கள் வரை 'சட்டக் கல்லூரி வாசல் போஸ்' போலவே அசையாமல் நின்றார்கள்.

சீறிய, லில்லி கல்பனா என்ற அந்தப் பெண்ணிடம் பேசினோம். ''இங்கே இருக்கிற தமிழனையே போலீஸ் தலையிட்டுக் காப்பாத்த முடியல... இலங்கைத் தமிழனுக்காகக் கண்ணீர் விடுறானுங்க, இந்த அரசியல்வாதிங்க! அடிமேல அடி விழுகுறப்ப மனிதாபி மானத்தோட காப்பாத்த முடியாத போலீஸை வெச்சு என்ன அரசாங்கம் நடத்தி என்ன பிரயோசனம்?'' என்று குமுறினார்.

தாக்கப்பட்ட மாணவர் பாரதிகண்ணனின் (கத்தியுடன் பாய்ந்து சென்று, கடைசியில் நையப் புடைக்கப்பட்டவர்) தந்தை கருப்பசாமியிடம் பேசினோம். ''தேவகோட்டைக்கு பக்கத்துல என் சொந்த ஊர். நல்லா படிக்கணும்னு சென்னைக்கு மகனை அனுப்பினேன். டி.வி-யில பாத்துட்டுத் துடிச்சுப்போய் வந்தேன். ஹைகோர்ட்டு, கோட்டை, சட்டசபை எல்லாம் நடந்துகிட்டு இருக்கிற எடத்துக்குப் பக்கத்துலேயே இவ்வளவு கொடூரம் நடந்திருக்கு! இதை எல்லாம் பாக்குறப்போ, 'நாம தமிழ்நாட்டுலதான் இருக்கோமா.. இல்ல வேறு எங்கேயோ இருக்கோமா'னு நினைக்கத் தோணுது. சாதி மோதல்தான் காரணம்னு சொல்லுறாங்க... எந்த சாதியா இருந்தாலும் ஆளுறவங்கதானே காப்பாத்தணும்!'' என்றார்.

மாணவர்களில் சிலரை முதல் கட்டமாகக் கைது செய்திருக்கும் நிலையில், எஸ்.சி. பிரிவைச் சேர்ந்த மாண வர்களோ, ''கிராமத்தைவிட்டு இங்கே படிக்க வந்தால், இங்கும் எங்களுக்கு எதிரான ஒடுக்குதல் தொடர்கிறது. அரசுத் தரப்பிலிருந்து எங்களுக்கு அளிக்கப்படும் சலுகைகளைக்கூட கிண்டல் செய்கிறார்கள் சிலர். இதனால் எங்கள் தரப்பு மாணவர்கள் மத்தியில் எழும் குமுறலை, கல்லூரிக்கு வெளியே உள்ள சில சக்திகள் வசமாக விசிறிவிட்டு, தங்களுக்குச் சாதகமாகப் பல குழப்பங்களை அரங்கேற்றிக் கொள்கின்றன'' என்கிறார்கள்.

இப்போது சட்டக் கல்லூரி வளாகங்களில் போலீஸ் குவிக்கப்பட்டிருக்கிறது; கல்லூரிகளுக்கும் விடுமுறை அறிவிக்கப்படிருக்கிறது. இருந்தும் கல்லூரிக்குள் மாணவர்கள் கொஞ்சம் பேர் இருந்தார்கள். ஒரு சில பேராசிரியர்களும் இருந்தனர்.

''இவ்வளவு நடந்தும் நீங்களாக போலீஸை அழைக்க வில்லையே, ஏன்?'' என அவர்களிடம் கேட்டோம்.

அவர்களோ, ''தேவர் ஜெயந்தி விழா அன்னிக்கு நடந்த பிரச்னை மறுபடி எதிரொலிக்கும்னு எதிர்பார்த்தோம். நேத்து பரீட்சை நடக்கும்போது கண்டிப்பா குறிப்பிட்ட மாணவர்கள் வருவாங்கனு தெரிஞ்சே அந்தக் கும்பல் தயாரா காத்திருந்தது. இவங் களும், தங்கள் மீது தாக்குதல் நடக்கலாம்னு தெரிஞ்சு கையில் ஆயுதங்களோடுதான் வந்திருந்தாங்க. மோதல் உறுதினு புரிஞ்சுகிட்டு, பகல் இரண்டரை மணிக்கே போலீஸ§க்கு தகவல் அனுப்பிட்டோம். இதோ பாருங்க ஆதாரத்தை!'' என்று சொல்லி, ஐ.ஜி. அலுவலகத்துக்கு அனுப்பப்பட்ட புகாரின் அக்னாலஜ்மெண்ட் நகலை எடுத்துக் காட்டினார்கள்.

அங்கே இருந்த மாணவர் களிடம் பேசியபோது, ''டிகிரி முடிச்சிட்டு வர்றவங்க இங்கே மூணு வருஷம் படிக்கணும். ப்ளஸ் டூ படிச்சிட்டு வர்றவங்க ஐந்து வருஷம் படிக்கணும். இதுல ஐந்து வருஷம் படிக்கிற மாணவர்களுக்குள்ளதான் பிரச்னை அவ்வப்போது வெடிக்கும். இப்ப நடந்த சம்பவத்தைவிட மோசமான தாக்குதல்கள்கூட எங்க காலேஜுல நடந்திருக்கு. போன வருஷம் மே மாதம் 28-ம் தேதி அன்னிக்கு விடுதிக்குள்ள நடந்த கொலைவெறித் தாக்குதல் இதைவிட மோசமானது. குறிப்பிட்ட ஒரு சாதி பையன் இரும்பு நாற்காலியை சத்தம் வரும்படி நகர்த்திப் போட்டான்னு பிரச்னையை ஆரம்பிச்சாங்க. ஏகப்பட்ட ஸ்டூடன்ட்ஸ§க்கு ரத்த காயம். ஹாஸ்டலுக்கு உள்ளேயே கத்தி, உருட்டைக் கட்டையெல்லாம் தயாரா பதுக்கி வச்சிருக்காங்க. இப்போதைய சம்பவத்தின்போதும், சுமார் அஞ்சு கிலோமீட்டர் தள்ளியிருக்கிற ஹாஸ்டலில் இருந்துதான் ஆயுதங்களை எப்படியோ காலேஜுக்குள் கொண்டாந்திருக்காங்க. மோதல்களுக்கான அடிப்படை எல்லாமே ஹாஸ்டலில் இருந்துதான் ஆரம்பிக்குது. இதை ஓரளவுக்காவது கட்டுப்படுத்தணும்னா பிற்படுத்தப்பட்ட சமூகத்து ஸ்டூடன்ட்ஸ§க்குத் தனியா விடுதி கொண்டு வரணும்'' என்றார்கள்.

கல்லூரி ஊழியர்களிடம் பேசினோம். ''மயங்கிய பிறகும் பாரதி கண்ணன் அடித்துத் துவைக்கப்பட்ட நுழைவாயிலுக்கு முன்பு இளங்கோ என்பவர்தான் வாட்ச் மேனா இருந்தார். அவரை மூணு மாதத்துக்கு முன்பு எழும்பூர் மருத்துவமனைக்கு மாத்திட்டாங்க. அவர் மீது அன்பும் மரியாதையும் எல்லா மாணவர்களுக்கும் உண்டு. அவர் இருந்திருந்தா... ஒருவேளை இந்தளவுக்குப் பிரச்னை வளர்ந்திருக்காது. உள்ளேயும் அப்படித்தான். பிரின்சிபால், புரொபசர் எல்லாம் தடுத்தபோதும் அவங்களை ஒருமையில் மிரட்டித் துரத்திய மாணவர்கள், கடைசியில் கேண்டீன்ல வேலை பார்க்கும் ஒரு பெரியவர் தடுத்த பிறகுதான் கொஞ்சம் அடங்குனாங்க. அவர் தன்னோட துண்டைத் தரையில் எடுத்துப்போட்டு, 'இதைத் தாண்டி யாரும் வரக்கூடாது... இது என் மேலே சத்தியம்'னு கட்டளை போட்டார். சோறு போட்ட அவர் பேச்சுக்குத்தான் மாணவர்கள் ஓரளவு அடங்கினாங்க!'' என்றனர்.

அடுத்து அவர்கள் சொன்னதுதான் அதிர்ச்சியின் உச்சம்-

''கேட் பக்கத்துல நிறைய போலீஸ்காரங்க நின்னாங்க. இங்கே நடக்கிற மோதல் பத்தி உடனுக்குடன் கமிஷனர் ஆபீஸ§க்குத் தகவல் சொல்லி இன்ஸ்ட்ரக்ஷன் கேட்டுக்கிட்டே இருந் தாங்க. அப்ப போலீஸ் மைக் கிலிருந்து யாரோ பெரிய அதிகாரியிடமிருந்து, 'உத்தரவு வரும் வரை எதுவுமே செய்ய வேண்டாம்... அந்த காலேஜ் பசங்களுக்கு இதே பொழைப்பா போச்சு. அடிச்சுக்கிட்டு சாகட்டும்... அப்படியே விடுங்கய்யா!'னு ஒரு தகவல் வந்துச்சு. கிட்டத் தட்ட 'முதல்வன்' படத்தில் வர்ற காட்சி மாதிரியேதான் அது இருந்தது!'' என்றனர் அவர்கள்.

நெருப்பாக விவகாரம் தகிக்கத் தொடங்கியதைத் தொடர்ந்து, உதவி கமிஷனர் உட்பட சஸ்பெண்ட் என்று அறிவித்த அரசாங்கம்... 'சம்பவ ஸ்தலத்தில் இருந்த போலீஸார் சும்மா வேடிக்கை பார்க்க என்ன காரணம்?' என்று சில தகவல்களை நம்பகமான வட்டாரங்களில் இருந்து கேட்டுப் பெற்றுக் கொண்டதாம். அதைத் தொடர்ந்து, சென்னை மாநகர கமிஷனராக இருந்த சேகரை உணவுக் கடத்தல் தடுப்புப் பிரிவுக்கு மாற்றி, அங்கே ராதாகிருஷ்ணனை நியமித்துள்ளது. சென்னை வடக்கு இணை கமிஷனராக இருந்த அபய் குமார் சிங் மாற்றப்பட்டு விட்டார். கூடுதல் போலீஸ் கமிஷனராக ஏ.கே.விசுவநாதன் நியமிக்கப்பட்டிருக்கிறார். சென்னை வடக்குபொறுப்பையும் அவர்கவனிப்பார். சில நாட்களுக்கு முன்பே துணை கமிஷனராக நியமிக்கப் பட்ட ஆசியம்மாளையும் அங்கிருந்து அகற்றி, பிரேம் ஆனந்த் சின்ஹாவை நியமித்துள்ளார்கள்.

இதற்கிடையே, சென்னை சட்டக் கல்லூரியில் நடந்த வன்முறை வெறியாட்டம், சாதிய ரீதியில் தமிழகத்தின் மற்ற சில கல்லூரிகளுக்கும் பரவக்கூடிய வாய்ப்பு இருப்பதாக உளவுத்துறை எச்சரித்துள்ளது. இப்போது பல்வேறு மாவட்டங்களிலும் போலீஸ் அலர்ட்!

காயப்பட்ட மாணவர்களை அ.தி.மு.க. தரப்பினர் மருத்துவமனையில் சந்தித்து ஆறுதல் சொல்லிவிட்டுப் போக... ''இந்த அரசு முக்குலத் தோருக்கு ஏற்படும் இன்னல்களைக் களைவதில் அக்கறை காட்டுவதில்லை. போலீஸ் மெத்தனத்துக்கு சாதி ரீதியான காரணங்கள் உண்டு'' என்று சொல்லி சாதிய ரீதியான உண்ணாவிரதம், போராட்டம் போன்றவற்றுக்கும் சில அமைப்புகள் தயாராகி வருகின்றனவாம். இதில் மத்திய அமைச்சர் ஒருவரின் சகோதரர், எஸ்.பி-யாக இருந்து ஓய்வு பெற்ற போலீஸ் அதிகாரி ஒருவரும் அடக்கம்.

நன்றி: ஜுனியர் விகடன்

468. வாழ்க நற்றமிழ் நாடு (அ) என்ன கொடுமை இது, பாரதி !!!

மாற்றமும் முன்னேற்றமும் கைக்கெட்டிய தூரத்தில் தான் !

467. எங்கே செல்லும் இந்தப் பாதை ?

சட்டக் கல்லூரி மாணவர்கள் பயங்கர வன்முறை


சென்னை சட்டக் கல்லூரியில் இரு பிரிவு மாணவர்களிடையே ஏற்பட்ட தகராறில் உருட்டுக்கட்டை, கத்தி போன்ற ஆயுதங்களுடன் தாக்கிக்கொண்டனர். போலீசார் முன்னிலையில் நடந்த இந்த கொலை வெறித் தாக்குதலில், மூன்று மாணவர்கள் உயிருக்கு ஆபத்தான நிலையில் மருத்துவமனையில் சிகிச்சை பெற்று வருகின்றனர்.

சென்னை, அம்பேத்கர் சட்டக் கல்லூரியில், "செமஸ்டர்' தேர்வு நேற்று நடந்து கொண்டிருந்தது. அப்போது மாணவர்கள் சிலர் உருட்டுக்கட்டை, கத்தி போன்ற ஆயுதங்களுடன் உலவிக் கொண்டிருந்தனர். தகவல் அறிந்ததும், நூற்றுக்கணக்கான போலீசார் கல்லூரி முன் குவிக்கப்பட்டனர். மாணவர்களுக்குள் இத்தகவல் பரவியதும், யாரும் வெளியில் வரவில்லை. மாலை 5 மணியளவில் மாணவர்களில் ஒரு பிரிவினர் கையில் கத்தி, அரிவாள், உருட்டுக்கட்டையுடன் கல்லூரியில் உலா வந்தனர். அவர்களைப் பார்த்ததும் மற்றொரு பிரிவினர், ஆயுதங்களால் பதில் தாக்குதல் நடத்தினர். இரு குழுவினரும் ஒருவரை ஒருவர் பயங்கர ஆயுதங்களால் தாக்கிக்கொண்டனர். மாலை 5 மணியளவில் துவங்கிய இந்த கொலைவெறி தாக்குதல், இரண்டு மணி நேரத்துக்கும் மேல் நீடித்தது. அந்த இடமே போர்க்களம் போல் காட்சியளித்தது. இந்த தாக்குதலில் நான்காம் ஆண்டு மாணவர் பாரதிகண்ணன் (22) மூன்றாம் ஆண்டு மாணவர் ஆறுமுகம் (19) இரண்டாம் ஆண்டு மாணவர் அய்யாதுரை (20) நான்காம் ஆண்டு மாணவர் சித்திரைச்செல்வன் (22) ஆகிய நால்வரும் பலத்த காயமடைந்தனர். மூவர் உயிருக்கு ஆபத்தான நிலையில் சென்னை அரசு மருத்துவமனையிலும், சித்திரைச்செல்வன் கீழ்ப்பாக்கம் அரசு மருத்துவமனையிலும் சேர்க்கப்பட்டுள்ளனர்.

காரணம் என்ன?: கல்லூரி மாணவர்கள், ஜாதி அடிப்படையில் இரு பிரிவாக பிரிந்து செயல்படுவதால், இந்தத் தாக்குதல் நடந்ததாக சில மாணவர்கள் தெரிவித்தனர். ஒரு வாரமாகவே ஒருவரை ஒருவர் தாக்கிக்கொள்ள திட்டமிட்டுள்ளனர். தகவல் அறிந்ததும், போலீசார் உஷாராகி கல்லூரி நிர்வாகத்திற்கு தகவல் கொடுத்துள்ளதாகக் கூறப்படுகிறது.

கல்லூரி முதல்வர் உறுதி: சட்டக் கல்லூரி வளாகத்தில், ஆயுதங்களால் தாக்கப்பட்ட சம்பவம் குறித்து கல்லூரி முதல்வர் ஸ்ரீதேவ், நிருபர்களிடம் கூறும்போது, ""இரண்டு பிரிவு மாணவர்களிடையே தகராறு ஏற்பட்டுள்ளது. கல்லூரி வளாகத்திற்குள் ஆயுதங்கள் கொண்டு வர அனுமதியில்லை. அனுமதியை மீறி கொண்டு வந்துள்ளனர். இது குறித்து போலீசாரிடம் புகார் அளிக்கப்படும். தவறு செய்த மாணவர்கள் மீது தகுந்த நடவடிக்கை எடுக்கப்படும்,'' என்றார்.

கொதித்தெழுந்த பொதுஜனம்: சென்னை சட்டக் கல்லூரியில் இரண்டு பிரிவு மாணவர்களிடையே ஏற்பட்ட தகராறில் இருதரப்பினரும் உருட்டுக் கட்டை, கத்தி, டியூப் லைட், கற்கள், அரிவாள் போன்ற ஆயுதங்களால் தாக்கிக் கொண்டனர். தனியாக சிக்கிய மாணவர்களை, ஒரு கும்பல் கொடூரமாக தாக்கியது. நான்கு பேர் ரத்த வெள்ளத்தில் மிதந்தனர். இக்காட்சியை குறளகம் சாலையில் சென்றுகொண்டிருந்த பொதுமக்கள் பார்த்தனர். மாணவர்களின் கொலைவெறித் தாக்குதல், போலீசார் முன்னிலையில் நடந்ததைக் கண்டதும், கடும் அதிருப்தியடைந்தனர். போலீஸ் அதிகாரிகளிடம் சென்று, "உங்கள் கண்ணெதிரிலேயே காட்டுத்தனமான தாக்குதல் நடந்து கொண்டிருக்கிறது; இதை பார்த்தும், பார்க்காதது போல் இருக்கிறீர்களே? நீங்கள் எல்லாம் சட்டம், ஒழுங்கை எப்படி காப்பாற்றப் போகிறீர்கள்? நாங்கள் சாட்சிக்கு வருகிறோம். அவர்களை கட்டுப்படுத்துங்கள்' என ஆவேசமாக தெரிவித்தனர். மேலும், மாணவர்களைப் பார்த்தும் அங்கிருந்த மக்கள் சத்தம் போட்டனர். மாணவர்களும் திருப்பி சத்தம் போட்டதால் பரபரப்பு ஏற்பட்டது. போலீசார், மக்களை சமாதானப்படுத்தி அனுப்பி வைத்தனர்.

சட்டக் கல்லூரி மாணவர்கள் 8 பேர் மீது வழக்கு: சென்னை அம்பேத்கர் சட்டக் கல்லூரியில் கொலைவெறித் தாக்குதலில் ஈடுபட்ட எட்டு மாணவர்கள் மீது, கொலை முயற்சி உள்ளிட்ட பிரிவுகளில் போலீசார் வழக்கு பதிவு செய்துள்ளனர். சென்னை அம்பேத்கர் சட்டக் கல்லூரி மாணவர்கள் இருதரப்பாக பிரிந்து, நேற்று பயங்கரமாக மோதிக்கொண்டனர். இத்தாக்குதலில் படுகாயமடைந்த நான்கு பேர், மருத்துவமனையில் உயிருக்கு ஆபத்தான நிலையில் சிகிச்சை பெற்று வருகின்றனர்.

இது குறித்து கல்லூரி முதல்வர் ஸ்ரீதேவ், எஸ்பிளனேடு போலீஸ் நிலையத்தில் புகார் கொடுத்தார். அதன்படி, இருதரப்பைச் சேர்ந்த மணிமாறன், ரவீந்திரன், சித்திரைச்செல்வன், குபேந்திரன், திலீப், வெற்றிச்செல்வன், ரவிவர்மன், பிரேம்குமார் ஆகியோர் மீது, கொலை முயற்சி, மிரட்டல், கலவரம் தூண்டுதல், ஆயுதம் வைத்திருத்தல் உள்ளிட்ட ஆறு பிரிவுகளில் போலீசார் வழக்கு பதிந்தனர். இரண்டாம் ஆண்டு மாணவர் திலீப்(22) கைது செய்யப்பட்டுள்ளார்.

சாலை மறியல்: தாக்குதலில் ஈடுபட்ட மாணவர்களை உடனடியாக கைது செய்யவேண்டும் என்று சென்ட்ரல் ரயில் நிலையம் எதிரே 50க்கும் மேற்பட்ட சட்டக் கல்லூரி மாணவர்கள் திடீர் சாலை மறியலில் ஈடுபட்டனர். தகவலறிந்த போலீசார் சம்பவ இடத்திற்கு சென்று மாணவர்களை சமாதானம் செய்து, கலைந்து போகச் செய்தனர். அதனால் அப்பகுதியில் ஒரு மணி நேரம் போக்குவரத்து ஸ்தம்பித்தது.

நன்றி: தினமலர்

Pl. read: சட்டக்கல்லூரி - இட்லிவடை வன்முறை என்பது வெறும் இரத்தத்தின் தெறிப்பா?! --- Kuzhali
சென்னை சட்டக்கல்லூரி மாணவர்களின் Blood sport --- Idlyvadai

466. நீதிமன்றத்தில் வக்கீல்கள் செய்யும் காமெடி

வக்கீல்: அவளுக்கு 3 குழந்தைகள், சரியா ?
சாட்சி: ஆம்
வக்கீல்: எவ்வளவு மகன்கள் ?
சாட்சி: ஒன்று கூட கிடையாது
வக்கீல்: எவ்வளவு மகள்கள்?
சாட்சி: என்ன, என்னை நக்கல் செய்கிறீர்களா ? கனம் நீதிபதி அவர்களே, எனக்கு இந்த வக்கீல் தேவையில்லை, வேறு வக்கீலை ஏற்பாடு செய்ய முடியமா ????

வக்கீல்: உங்களின் முதல் திருமணம் எவ்வாறு முடிவுக்கு வந்தது ?
சாட்சி: மரணத்தின் வாயிலாக
வக்கீல்: யாருடைய மரணத்தினால்?
சாட்சி: தாங்கள் என்ன நினைக்கிறீர்கள் ????

வக்கீல்: அந்த நபரை விவரிக்க முடியுமா?
சாட்சி: அவர் நடுத்தர உயரமாக, தாடியும் வைத்து இருந்தார்.
வக்கீல்: அந்த நபர் ஆணா பெண்ணா ?
சாட்சி: நீங்கள் கண்டுபிடியுங்களேன் !?!?!

வக்கீல்: நான் உங்கள் வக்கீலுக்கு அனுப்பிய நோட்டீஸை முன்னிட்டுத் தானே, இக்காலையில் இங்கு தங்களின் தோற்றம் அமைந்தது?
சாட்சி: இல்லை, நான் பணிக்குச் செல்கையில் பொதுவாக இப்படித் தான் அலங்கரித்துக் கொள்வேன்!?!?

வக்கீல்: டாக்டர், எத்தனை பிரேதப் பரிசோதனைகள் தாங்கள் இறந்தவர்கள் மீது செய்து இருக்கிறீர்கள் ?
சாட்சி: என்னுடைய அனைத்து பிரேதப் பரிசோதனைகளும் இறந்தவர்கள் மீதே நடந்துள்ளன!!! அதே கேள்வியை சற்று மாற்றி அமைத்துக் கேட்க தங்களுக்கு விருப்பமா ?!?!

வக்கீல்: தங்களின் அனைத்து பதில்களும் வாய்மொழியாக இருத்தல் அவசியம், சரியா? நீங்கள் எந்தப் பள்ளிக்கு சென்றீர்கள்?
சாட்சி: வாய்மொழி!?!?!

வக்கீல்: தாங்கள் எத்தனை மணிக்கு பிரேதத்தை பரிசோதித்தீர்கள் என்பதை நினைவு கூர முடியமா?
சாட்சி: பிரேதப் பரிசோதனை இரவு 8.30 மணிக்குத் தொடங்கியது
வக்கீல்: திரு.ரகுராமன் அந்நேரம் இறந்து போயிருந்தாரா ?
சாட்சி: இல்லை, அவர் பரிசோதனை மேஜையின் மீது அமர்ந்தவாறு, நான் ஏன் இந்த பிரேதப் பரிசோதனையை அவர் மீது செய்து கொண்டிருந்தேன் என்ற ஆச்சரியத்தில் மூழ்கியிருந்தார் !?!?!

வக்கீல்: இந்த மையஸ்தேனியா கிராவிஸ் (myasthenia gravis) ஆனது தங்களின் நினைவாற்றலை பாதிக்குமா?
சாட்சி: ஆம்
வக்கீல்: எவ்வகையில் அது தங்கள் நினைவாற்றலை பாதிக்கிறது ????
சாட்சி: எனக்கு மறதி ஏற்படுகிறது !!!
வக்கீல்: ஓ மறதியா ? நீங்கள் மறந்தது குறித்து ஏதாவது எடுத்துக்காட்டு தர இயலுமா ?!?!?!

வக்கீல்: காலை எழுந்தவுடன் உங்கள் கணவர் உங்களிடம் என்ன கேட்டார் ?
சாட்சி: அவர், "சுசீலா, நான் எங்கிருக்கிறேன்?" என்றார்
வக்கீல்: அக்கேள்வி தங்களை ஏன் கோபம் கொள்ள வைத்தது?
சாட்சி: ஏனெனில், என் பெயர் ஜானகி !?!?!

கீழுள்ளது தான் best of the best :)

வக்கீல்: டாக்டர், தாங்கள் பிரேதப் பரிசோதனையைத் துவங்குவதற்கு முன், நாடித்துடிப்பை கவனித்தீர்களா ?
சாட்சி: இல்லை
வக்கீல்: ரத்த அழுத்தத்தை சோதித்தீர்களா ?
சாட்சி: இல்லை
வக்கீல்: சுவாசம் உள்ளதா என்று பார்த்தீர்களா ?
சாட்சி: இல்லை
வக்கீல்: எனவே, தாங்கள் பிரேதப் பரிசோதனையைத் தொடங்கிய சமயம், அந்த நோயாளி உயிரோடு இருந்திருக்கக் கூடிய சாத்தியம் உள்ளது, அப்படித் தானே ?
சாட்சி: இல்லை
வக்கீல்: எப்படி அதை அவ்வளவு நிச்சயமாக உங்களால் கூற முடிகிறது ?
சாட்சி: ஏனெனில், அம்மனிதரின் மூளையானது எனது மேஜையின் மீதிருந்த ஒரு குடுவைக்குள் அமர்ந்திருந்தது !?!?
வக்கீல்: ஓ அப்படியா? இருந்தும், அபோது அந்த மனிதர் உயிரோடு இருந்திருக்க சாத்தியமா???
சாட்சி: உண்டு, அம்மனிதர் உயிரோடு இருந்திருக்கவும், சட்டம் பயின்று கொண்டிருக்கவும் கூடிய சாத்தியங்கள் இருப்பதாகவே உணர்கிறேன் !?!?!?

பி.கு: மேற்கூறப்பட்டவை எல்லாம், அமெரிக்க நீதிமன்றங்களில் நிஜமாகவே பேசப்பட்டவை என்பதை தயவு செய்து நம்புங்கள் :) வக்கீல்கள் எப்பேர்ப்பட்ட புத்திசாலிகள் என்று உங்களுக்கு ஒரு ஐடியா கிடைத்திருக்கும் என்று நினைக்கிறேன் ;-)

எ.அ.பாலா

நன்றி: Disorder in the American Courts

465. ரஜினி மன்னிப்பு கேட்கணும்...குரல் உயர்த்தும் இந்துமத அமைப்புகள்

வாலு போயி கத்தி வந்திச்சு டும்டும்டும்... ராமர் பாலம் பிரச்சனையே இன்னும் முடியவில்லை. அதற்குள், பகவத் கீதையை அவமானப்படுத்தி விட்டார் ரஜினி என்று குரல் கொடுக்க ஆரம்பித்துவிட்டார்கள் சிலர். தலைக்கு ஹெல்மெட் மாதிரி வாய்க்கு ஏதாவது ஹெல்மெட் இருந்தால் சொல்லுங்க என்கிற அளவுக்கு வெறுத்து போயிருக்கிறார் ரஜினி.

'கடமையை செய், பலனை எதிர் பார்' இப்படி ஒரு ஸ்லோகனுடன் தனது ரசிகர்களை சந்தித்தார் ரஜினி. அப்போது, பகவத் கீதையில் கடமையை செய், பலனை எதிர்பார்க்காதே என்று கண்ணன் சொன்னதில் எனக்கு உடன்பாடில்லை என்ற ரீதியில் கருத்து சொல்லப் போக, கொதித்து எழுந்துவிட்டார்கள் சில இந்து மத அமைப்பினர்.

கருத்து சுதந்திரத்தை குருத்தோடு வெட்டிப்போடும் இவர்கள், இப்போது தனது பேச்சுக்காக ரஜினி மன்னிப்பு கேட்க வேண்டும் என்று கோஷம் போட ஆரம்பித்திருக்கிறார்கள். பதில் சொல்ல வேண்டிய ரஜினி இந்நேரம் எந்த தேசத்தில் இருக்கிறாரோ?

 

நன்றி: tamilcinema.com

என்னப்பா நியாயம் இது ?!?! கண்ணன் சொன்னதில நம்பிக்கை இல்லன்னு சொல்றதுக்குக் கூட கருத்துச் சுதந்திரம் கிடையாதா ?  என்ன ஒரு சகிப்புத்தன்மையற்ற மாசுச் சூழல் :( 

சுஜாதாவின் அட்வைஸை மதிக்காத பதிவர் பினாத்தல் சுரேஷ்- by கி அ அ அனானி

கி அ அ அனானியிடமிருந்து மடல், அரசியல் கலக்காத சாத்வீகமான மேட்டர் for light reading :) . யான் பெற்ற இன்பம் பெறுக இவ்வையகம்!
எ அ பாலா
************************************

எழுத்தாளர் சுஜாதாவின் எழுத்தில் சின்னச் சின்ன விஷயங்களை அனுபவ பூர்வமாகவும் ,சுவையாகவும் படிப்பவருக்கு பயனுள்ள வகையிலும் சொல்லும் ஆற்றல் இருக்கும்। உதாரணத்துக்கு 1997 ல் "சுஜாதாட்ஸ்"என்ற கட்டுரைத் தொகுப்பில் சென்னை ட்ராபிக் பற்றி தனக்கே உரிய பாணியில் சுவையாக எழுதியிருக்கிறார் (5/11/08 தேதியிட்ட குமுதத்தில் வந்திருக்கிறது) அதில்

" எந்த ட்ராஃபிக் விளக்கிலும் ஒரு பல்ப்பாவது எறியாது।அம்பர்-மஞ்சள் இருந்தால் மிக வேகமாகப் போகலாம்.ஆனால் ஒரு கண்டிஷன்.பாதியில் சிகப்பு வந்தால் மென்னியைப் பிடிப்பது போல் பிடேக் போடாதீர்கள்.உமக்குப் பின்னால் மூணு பேர் உம்மை நம்பி அதே வேகத்தில் வந்து கொண்டிருப்பார்கள்.பகவான் மேல் பாரத்தைப் போட்டுவிட்டு போய்க் கொண்டே இருங்கள்"

என்று எழுதியிருந்ததைப் படித்ததும் இந்த உபதேசத்தைப் பின்பற்றாமல் சமீபத்தில் கோயம்பேடு சிக்னலில் நல்ல பிள்ளையாய் ப்ரேக் அடித்து கழுத்தெலும்பை உடைத்துக் கொண்ட பினாத்தல் சுரேஷ்

ஞாபகம்தான் வந்தது . :)

பினாத்தலாரே..சுஜாதாவை படிச்சா மட்டும் போதாது..அட்வைசை ஃபாலோவும் பண்ணணும் :)

சென்னை ட்ராபிக் பற்றி சுஜாதா அதே கட்டுரையில் எழுதியிருக்கும் இன்னும் சில விஷயங்கள்
************************************

சென்னை போக்குவரத்துக்கென்று சில தனிப்பட்ட எழுதப்படாத விதிகள் இருக்கின்றன.அவைகளை சென்னையின் சாலைகளை பயன்படுத்துவோர் அறிந்து கொள்வது முக்கியம்.எந்த நிமிடமும் நீங்கள் கீழ்க்காணும் நிகழ்ச்சிளை சாலையில் எதிர்பார்க்கலாம்.

திடீர் என்று எதையோ மறந்து விட்ட சைக்கிள்காரர் சரேல் என்று திரும்பி "யு" டர்ன் அடிப்பது

பஸ்களின் பின்பக்க வாசலிலிருந்து எந்த தருணத்திலும் எந்த வேகத்திலும் பயணிகள் உதிர்ந்து,கொஞ்ச தூரம் ஓடி சமாளிப்பார்கள்.அவர்கள் மேல் உங்கள் வாகனத்தை ஏற்றி விடக் கூடாது.

ஆட்டோ ரிக்ஷாக்கள் காட்டும் கை சிக்னல்கள் ஏறக்குறைய மனசுக்குள்தான் இருக்கும்.அரிதாக ஒரு விரல் மட்டும் காட்டி விட்டு சரேல் என்று திரும்புவார்கள்.உன்னிப்பாக கவனிக்க வேண்டும்.பஸ் எப்போதும் எங்கேயும் நிற்கும்.பஸ் நிறுத்தத்தில் மட்டும் அவை நிற்க்க வேண்டும் என்றில்லை.அப்படி நின்றாலும் நடுத்தெருவில் நிற்கும்.

எந்த சாலை விபத்திலும் பெரிய வண்டிதான் குற்றவாளி.,பாதசாரி-சைக்கிள் விபத்தில் சைக்கிள்காரர்தான் காரணம்,சைக்கிள்-ஸ்கூட்டரில் ஸ்கூட்டர்தன்,ஸ்கூட்டர் ஆட்டோவில் ஆட்டோ,ஆட்டோ-கார் என்றால் கார்,கார் -பஸ் என்றால் பஸ்,பஸ் -ரோடு இஞ்சின் என்றால் ரோடு இஞ்சின்.

தண்ணீர் லாரிகளும் சைலன்சர் இல்லாத கார்ப்பரேஷன் குப்பை லாரிகளும் தனிச்சையாக இயங்குபவை.அவர்களுக்கு எந்த ரூலும் கிடையாது.

************************************


இந்த 2008 ஆம் ஆண்டில் இன்னும் பொது மக்களைக் கொலை நடுங்க வைக்க "ஷேர் ஆட்டோக்களும்" சேர்ந்து கொண்டுள்ளன என்பது தவிர வேறு ஏதேனும் மாற்றம் இருக்கிறதா என்ன? :)

கி அ அ அனானி

463. நகைச்சுவை வித்தகர் சோ - காபி வித் அனு

நேற்றிரவு விஜய் டிவி ஒளிபரப்பிய 'காபி வித் அனு' நிகழ்ச்சியில் சோ அவர்களும், மௌலி அவர்களும் கலந்து கொண்டு ஒரு கலக்கு கலக்கினார்கள். எதிர்பார்த்தது போல, டோ ண்டு சார் இந்த நிகழ்ச்சி பற்றி ஒரு நீண்ட பதிவு போட்டு தனது 'சோ அபிமானத்தை' மற்றொரு முறை நிரூபித்து விட்டார் ;-) எனவே நான் ஒரு மினி அலசலோடு நிறுத்திக் கொள்கிறேன்!

சோ அவர்களுக்கு satirical / subtle வகை நகைச்சுவை இயல்பாக அமைந்துள்ள ஒரு சங்கதி. அதனால், பார்ப்பவரை அவரால் எளிதில் கட்டிப்போட்டு விட முடிகிறது, அவரைப் பிடிக்காதவர்களைக் கூட :) அவர் பேசியதிலிருந்து சில துளிகள்:

1. யாரோ ஒருவர் சோவை, அவர் வாக்கிங் போகிறாரா என்றதற்கு, அவருக்கே உரித்தான பாணியில், "இல்லை டாக்கிங் மட்டும் தான் போய்க் கொண்டிருக்கிறது" என்றாராம்!

2. அவரது நண்பர் ரங்கா என்பவர் அவரை வற்புறுத்தி ஒரு முறை காலை வாக்கிங்குக்கு அழைத்துச் சென்றாராம். கொஞ்சம் நடந்தவுடனேயே, சோவுக்கு போரடித்து விட்டது. அச்சமயம், அவ்வழியில் நாய் ஒன்று (அவர்களுக்கு முன்னால்) கொஞ்ச தூரம் ஓடிச் சென்று மீண்டும் திரும்பி வந்ததை சோ ரங்காவிடம் காண்பித்து, "ரங்கா, இந்த நாய்க்கும் நமக்கும் இப்ப ஒரு வித்தியாசமும் இல்ல!" என்று சொல்ல அப்செட் ஆன ரங்கா மறந்து கூட சோவை வாக்கிங்குக்கு அழைப்பதில்லையாம் ...

3. அது போலவே, ஒழுங்காக உடற்பயிற்சி செய்து கொண்டிருந்த நண்பர் ஒருவரிடம் சோ அவர்கள், நல்ல உடற்கட்டு கொண்டவர்கள் ஒரு போது சாதனையாளர்களாக இருந்ததில்லை என்ற சந்தேகத்தை கிளப்பி விட்டு அதோடு, 'ஒரு மனிதனுக்கு ஒன்று கட்டான உடலமைப்பு இருக்க முடியும் அல்லது அறிவாற்றல் இருக்க முடியும், இரண்டும் சேர்ந்து அமைய வாய்ப்பே கிடையாது' என்று சோ நண்பரை மேலும் குழப்பி விட நண்பர் உடற்பயிற்சியை நிறுத்தி விட்டாராம் :)

4. நிகழ்ச்சியின் விளம்பர இடைவேளை ஒன்றுக்கு முன்னால் அனு, சோ மற்றும் மௌலியிடம், "நீங்க ரெண்டு பேரும் நான் சொல்ற டாபிக்ல பேசணும், இப்ப ஒரு சின்ன கமர்ஷியல் பிரேக்" என்றவுடன் சோ, "நீங்க சொல்ற டாபிக்ல பேசணும், நீங்க சொல்றபோது பிரேக், எல்லாம் ஒரே பொம்பளை ராஜ்ஜியமா இருக்கு!" என்று அனுவை ஒரு போடு போட்டது அருமை :)

5. சோ மௌலியையும் விட்டு வைக்கவில்லை! மௌலி தான் நாடகம் எழுத வந்ததற்கு சோ தான் இன்ஸ்லிரேஷன் என்றும், சோவைப் பார்த்து தான் தனக்கு தன்னம்பிக்கை வந்தது என்றும் கூறியபோது இடைமறித்த சோ, 'இவனே (சோ) நாடகம் போடும்போது தன்னால் முடியாதா என்ன என்பதைத் தான் மௌலி மிகவும் பாலிஷாகக் கூறுவதாக' மௌலியை வாரியது ரசிக்கத் தக்கது!

6. அது போலவே, சோ கடந்த 25 வருடங்களாக 'அதே மாதிரி' இருப்பதை மௌலி ஒரு பாராட்டாகக் கூற, சோ அனுவிடம், "கடந்த 25 வருடங்களாக என்னிடம் எந்த improvement-ம் இல்லை என்பதை மௌலி எத்தனை நாசூக்காகச் சொல்கிறார், பாருங்கள்" என்று கூறி ஒரு ஸிக்ஸர் அடித்தார் :)

7. மௌலி, விசு, கே.பி ஆகிய மூவரும் நாடக உலகிலிருந்து சினிமாவுக்குச் சென்று, வெகு விரைவாகவும் எளிதாகவும் அதன் நுணுக்கங்களையும், நெளிவு சுளிவுகளையும் கற்றுத் தேர்ந்து விட்டதையும், தான் அவர்கள் போல வெற்றி பெற இயலவில்லை என்றும் நினைவு கூர்ந்தார்.

8. திருப்பி வைக்கப்பட்ட (பிரபலங்களின்) புகைப்படங்களில் மூன்றைத் தேர்ந்தெடுத்து அவர்களைப் பற்றி (கா.வி.அ) நிகழ்ச்சிக்கு அழைக்கப்பட்ட விருந்தினர் பேச வேண்டிய பகுதி உள்ளது. சோ முதலில் ஜெய்சங்கரின் போட்டோவை எடுத்தார். தனது சிறந்த நண்பர், பரோபகாரி, பல தயாரிப்பாளர்களை உருவாக்கியவர், An actor by his own right என்றும் ஜெய்யை மிகவும் சிலாகித்துப் பேசினார்.

அடுத்து சோ எடுத்தது, ஜெயலலிதாவின் போட்டோவை! எடுத்தவுடன், "நமக்குன்னு வருது பாருங்க!" என்று தமாஷ் பண்ணிவிட்டு, தான் அவரை பலமுறை விமர்சித்திருப்பதை சுட்டிக் காட்டி விட்டு, இந்தியாவில் உள்ள பெண் அரசியல்வாதிகளிலேயே திறமையானவர் ஜெயலலிதா என்றும், ஜெவின் courage, confidence, knowledge, administrative abilities ஆகியவற்றை வைத்துப் பார்க்கும்போது அவர் அரசியலில் இன்னும் உயரத்துக்கு செல்ல முடியும் என்றார் !

அடுத்து ஆச்சி மனோரமாவை மிகவும் பாராட்டிப் பேசினார். மனோரமா அன்றிலிருந்து இன்று வரை திரையுலகில் பிரகாசிப்பதைச் சுட்டிக் காட்டி, நடிப்புக்கு ஆண்களில் சிவாஜி என்றால், பெண்களில் மனோரமாவாகத் தான் இருக்க முடியும் என்றார் சோ. நாகேஷின் திறமையையும் மனம் திறந்து பாராட்டினார். அது போல, டி.ஆர். ராமச்சந்திரனுக்குப் பிறகு, சாதாரண தோற்றமுடைய ஒருவர், காமெடி ஹீரோவாக வெற்றி பெற முடியும் என்பதை நிரூபித்தவர் பாண்டியராஜனே என்று அவரையும் பாராட்டினார்.

9. கலைஞர் பற்றிக் கேட்டபோது, மிகச் சாதாரண நிலைமையிலிருந்து இத்தனை உயரத்தை அவர் அடைந்ததற்கு அவரது கடுமையான உழைப்பும், சாமர்த்தியமும் காரணங்கள் என்றார். அது போல, ரஜினி பல விஷயங்கள் பற்றி வெளிப்படையாக பேசாவிட்டாலும், ஒவ்வொரு விஷயம் பற்றியும் ரஜினிக்கென்று ஒரு தெளிவான கருத்துள்ளதாகவும் சோ குறிப்பிட்டது சற்று ஆச்சரியத்தை வரவழைத்தது ! "ரஜினி வேண்டுமா, கமல் வேண்டுமா?" என்ற கேள்விக்கு, தான் யாருக்கும் வெறிபிடித்த ரசிகன் இல்லை என்பதால் தனக்கு இருவருமே வேண்டும் என்று அரசியல்வாதி ஸ்டைலில் சோ எஸ்கேப் :)

10. நிகழ்ச்சிக்கு சோ தந்த Finishing Touch மறக்க முடியாதது ! அனு சோவிடம், "இந்த நிகழ்ச்சியின் காபி அவார்டை யாருக்கு, எதற்காகக் கொடுப்பீர்கள்?" என்று வினவியதற்கு சோ, எதையும் குடும்பத்தினருக்கே தர வேண்டும் என்ற தற்போதைய தமிழக நடைமுறையின்படி தான் நடக்க விரும்புவதால், அந்த அவார்டை தனது பேத்திக்கே அளிக்க விருப்பமென்றும், "ஊரோடு ஒத்து வாழ வேண்டும்" என்பதும் அதற்குக் காரணம் என்றும் சொல்லி, ஜெயசூர்யா ஸ்டைலில் பாயிண்ட் பவுண்டரி மேல் ஸிக்ஸர் அடித்தபோது, அனுவும் மௌலியும் சிரிப்பை அடக்க சற்று சிரமப்பட்டதென்னவோ நிஜம் :)

சோ அத்தோடு விட்டாரா! தன் 9 வயது பேத்தி நன்றாக 'கவிதை' எழுதுகிறாள், ஆனால் ஆங்கிலத்தில் எழுதுகிறாள் என்று கங்குலி ஸ்டைலில் டைமிங்காக ஒரு ஷாட் அடித்தது சூப்பர் !

இது போல ஒரு 'காபி வித் அனு' நிகழ்ச்சியை இதுவரை பார்த்ததில்லை. சிரித்து சிரித்து வயிறு புண்ணாகி விட்டது. Yesterday, it was a real one man show !!!

என்றென்றும் அன்புடன்
பாலா

462. ஈழத்தமிழர் பிரச்சினையும் நடிகர்கள் உண்ணாவிரதமும் - கி.அ.அ.அனானி

ரொம்ப நாட்களுக்குப் பிறகு கி.அ.அ.அனானியிடமிருந்து மடல், என்ன என்று பார்த்தால் மேட்டர் சுடச்சுட இன்று நடந்த (இலங்கைத் தமிழர் நலனுக்காக) திரையுலக உண்ணாவிரதப் போராட்டம் பற்றி ! கி.அ.அ.அ வின் finishing touch அருமை. யான் பெற்ற இன்பம் பெறுக இவ்வையகம்!
************************************
ஈழத் தமிழர் பிரச்சினையை மையமாக வைத்து தமிழ் திரைப்பட நடிகர்கள்(தென்னிந்திய திறைப்பட நடிகர் சங்கம் சார்பாக) இன்று ஒரு நாள் உண்ணாவிரதம் இருந்து தங்களது உணர்வை வெளிப்படுத்தினர்.

அதை சன் தொலைக் காட்சி முழு நாளும் நேரடி ஒளிப்பதிவு செய்தது. முழுவதும் காணக் கூடிய சந்தர்ப்பம் வாய்க்கவில்லை என்றாலும் அங்கங்கே பார்த்தவற்றிலிருந்து சில துணுக்குகள்

-நடிகர் சங்க வளாகத்துக்குள்ளாகவே உண்ணா விரதத்தை நடத்த முடிவு செய்து அதை திறம் பட நடத்தவும் செய்திருந்தார்கள் (நடிகர் சிவக்குமார் சொன்ன யோசனையின் பேரில் என்றார்கள்,(--always a sensible actor, Weldone Sivakumar).ராதாரவி திறம்பட காம்பையரிங் செய்து கொண்டிருந்தார்.

-முதலிலேயே அதிகம் controversial யான கருத்துக்களை பேச வேண்டாம் என்று சங்கத்தின் வாயிலாக சொல்லிவிட்டிருந்த படியால், அனைவருமே ஒரு வரம்புக்கள்தான் பேசினார்கள்.அதனால் யார் அதிக தமிழ் இன மான உணர்வை வெளிப்படுத்துகிறார்கள் என்பது போல் தொடங்கி போட்டி போட்டுக் கொண்டு உளரும் அபத்தங்கள்(பார்த்த வரை) குறைவாகவே இருந்தது.

-மன்சூர் அலிகான் எங்கு பேசினாலும்(ராமேஸ்வரத்திலும் கூட) பெண்கள் கற்பழிக்கப் படுவது பற்றியே பேசுவது coinsidense-ஆ அல்லது தனக்கு நன்கு பழக்கப் பட்ட subject-ஐ பேசுகிறார் என்று கொள்ளவேண்டுமா?

-விஜய் தனது லட்சோபலட்சம் ரசிகர்களையும் போர் நிருத்தத்தை வலியுருத்தச் சொல்லி பிரதமருக்கு தந்தி அடிக்கச் சொன்னார். பிறகு தனக்கு அத்தனை ரசிகர்கள் இல்லை என்று நினைத்தாரோ என்னவோ என் ரசிகர்கள் மட்டுமல்ல எல்லோரும் தந்தியடிக்கலாம் என்று கேட்டுக் கொண்டார்- கலைஞர் சொன்ன போது நீங்க போஸ்ட் ஆபிஸ் போய் தந்தி அடிச்சீங்களா விஜய் ?

-சத்தியராஜ் ஈழத்தில் தமிழர்கள் சாவது குண்டு மழையால் இல்லை, மூப்பினாலும்,கேன்சரினாலும் என்று எதிர்மறையாக காமெடி செய்து பொருள் விளங்க வைக்க முயன்று தோற்றுப் போனது பரிதாபமாக இருந்தது. உணர்ச்சிகளைக் கொட்டும் போது கொஞ்சம் அப்படி இப்படி எல்லை மீறத்தான் செய்யும் என்று கைதான இயக்குனர்களுக்கு வக்காலத்து வாங்கியவரை " உணர்ச்சிகளை கட்டுப் படுத்துபவன்தான் மனிதன்" என்று ரஜினிகாந்த் பேசும்போது போகிற போக்கில் மறைமுகமாக குட்டியது.. பாவம் புரிந்ததோ புரியவில்லையோ?

-ரஜினி " ஒரு நாட்டில் பொது ஜனங்களை கஷ்டப் படுத்தினால்,ஏழை எளிய மக்கள் கண்ணீர் விட்டால், அவர்களது பெருமூச்சில் அந்த நாடு உருப்படாமல் போகும்" என்று சொல்லும் போது அவர் ஈழத்தமிழர் நிலை குறித்து சொல்கிறாரா அல்லது தமிழகத்தில் விலைவாசி மின்வெட்டு போன்றவற்றால் அவதிப் படும் தமிழனின் பெருமூச்சு பற்றி "கடவுளாலும் காப்பாற்ற முடியாது " போல வாயிஸ் கொடுக்கிறாரா என அனைவரும் ஒரு நிமிடம் திகிலுடன் பார்த்தது நிஜம்.

- எஸ் ஜே சூரியா பேசும் போது ஈழத் தமிழர்களையெல்லாம் தமிழ் நாட்டில் குடியமர்த்தி விடலாம் என யோசனை சொன்னார் - (இவ்வளவு அப்பாவியா நீங்க எஸ் ஜே சூர்யா இல்லைனா தமிழனை வச்சு கமெடி கீமெடி ஏதும் பண்ணுறீங்களா?)

- தல "அஜித்" எப்படா பேசக் கூப்பிடுவார்கள் என்பது போலக் காத்திருந்து " எங்களை எங்க வேலையைச் செய்ய விடுங்கள்' என ஒற்றை வரியில் பன்ச் வைத்து விட்டு உட்கார்ந்தார்- வேணுங்குற எடத்துல பேச மாட்டிங்கிறீங்க, வேண்டாத எடத்துல வாயக் குடுத்து மாட்டிக்கிறீங்களே,தல ?

-திருமாவளவன் பேசும் போது, இலங்கையில் தமிழர்கள் பூர்வ குடிகள், சிங்களவர்கள்தான் (ஒரிசாவிலிருந்து) வந்த வந்தேரிகள். மேலும் இந்தியா தமிழர்களை பாதுகாக்க வேண்டும் ஏனெனில் "தமிழர்கள் அனைவரும் இந்துக்கள்" என்று சொன்னார்(இது சொன்னது திருமாதானா வேறு யாராவதா என எனக்கு ஒரு சதவிகித டவுட் உள்ளது, யாராவது கன்ஃபார்ம் பண்ணினால் தேவலை)- அப்படியா திருமா? தமிழ் வலயுலகுல நிறையப்பேர் அப்படி இல்லைன்னு சொல்லிக்கிட்டு இருக்காங்க,அதுனால கூடிய சீக்கிரம் உங்களுக்கும் "வந்தேறி"ப் பட்டம் கிடைக்க வாய்ப்புள்ளது.

-கமல் பேசும் போது உணர்வுகளை வெளிப்படுத்த வேண்டும் ,உணர்ச்சிகளை வெளிப்படுத்தக் கூடாது என வார்த்தை ஜாலம் காட்டினார். பேசிக் கொண்டிருக்கும் போது நடுவில் பழ.நெடுமாறன் மேடைக்கு வந்ததால் பேச்சை நிறுத்தியவர்" நான் பேச்சை நிறுத்தியது கேட்பவர் கவனம் சிதரியதென்பதற்காக அல்ல, பெரியவர் நெடுமாறனுக்கு உரிய மரியாதை வணக்கம் செய்ய வேண்டுமே என்பதற்காத்தான் என்று சமாளித்தார். நிவாரணத்திற்கு ஐந்து லட்சம் அறிவித்தவர் வீட்டுக்குப் போய் அனுப்புவதாக சொன்னார் :)

இதெல்லாம் தவிர

-வழக்கம் போல் சன் டீவி ஃபுல் கவரேஜ் கொடுத்து அட்வர்டைஸ்மெண்டுகளுடன் நிகழ்ச்சியை ஒளிபரப்பி தன் கலெக்'சன்'னை பார்த்துக் கொண்டது.

-வழக்கம் போல் தமிழ் மகா சனங்கள் திரை நட்சத்திரங்களைக் காண கூட்டமாக வந்து "திருப்பதி சாமி தரிசனம்" செய்வது போல் முண்டியடித்துப் போய்க்கொண்டிருந்தார்கள்.

-வழக்கம் போல் முன்னணி நடிகையர் அலங்காரமாக வந்து சும்மா உட்கார்ந்து ஈழத்தமிழர் பிரச்சினை பற்றியெல்லாம் தங்களுக்கு ஏதும் தெரியாது என்பதை வெளிப்படையாக காட்டிக் கொண்டிருந்தார்கள்.

-வழக்கம் போல் இன்றும் சிங்கள ராணுவம் , விடுதலைப் புலிகள் மற்றும் தமிழர் குடியிருப்புப் பகுதியில் தாக்குதல் நடத்தியது

461. 'இட்லிவடை' பிடிக்காத தமிழர்கள் உண்டா ?

வலையுலக "வெட்டி ஒட்டி"யும், பாடிகார்ட் முனீஸ்வரனின் நெருங்கிய நண்பரும், மஞ்சக்கலர் 'பஞ்ச்' கருத்துகளுக்கு பிரசித்தி பெற்றவரும், ஆட்டோ வுக்கு பயந்து அனானிமஸாக வனவாசத்தில் இருப்பவரும் ஆன உலகபுகழ் "இட்லிவடை", அவரது வலைப்பதிவின் 5 ஆண்டு பூர்த்தியை முன்னிட்டு, பதிவொன்று எழுதித் தருமாறு என்னைக் கேட்டுக் கொண்டார்.   நான் எழுதித் தந்ததை அவரது வலைப்பதிவில் இன்று பதிப்பித்துள்ளார்.  ஒரு ரெஃபரென்ஸுக்கு வேண்டி, அந்த மேட்டரை எனது இங்கே (எனது வலைப்பதிவில்) பதிவாக இடுகிறேன்.
*************************************************

எனக்கு ரத்னா கேப் இட்லிவடையையும் பிடிக்கும், தமிழ் வலையுலக இட்லிவடையையும் பிடிக்கும்:) இன்று (27-10-2008), அதாவது 'தீபாவளி' அன்று, ஐந்தாம் ஆண்டு நிறைவைக் கொண்டாடும் இட்லிவடையாருக்கு முதலில் "பாரா"ட்டுகளும், வாழ்த்துகளும்...  இந்த 5 வருடங்களாக, கிருஷ்ண பரமாத்மா மகாபாரதத்தில் அடித்த லூட்டிக்கு இணையான ஒன்றை இவர் தமிழ் வலைப்பதிவுலகில் அடித்து வருகிறார் ;-)

முதலில் ஒன்றைக் குறிப்பிட வேண்டும்.  வலைப்பதிவு பிரபலங்கள் கூட "என்னை இட்லிவடை என்று நினைக்கிறார்கள்" என்ற விஷயத்தை உள்ளுக்குள் சற்று பெருமையாக உணரும் / அதை வெளிப்படுத்தவும் செய்யும் உளவியலிலும், இ.வ-வின் அயராத உழைப்பிலும், தொழில்நுட்பத் திறமையிலும் தான் அவரது வெற்றியின் ரகசியம் அடங்கியிருக்கிறது :) அவரது வலைப்பதிவின் side bar சமாசாரங்களையும், அடிக்கடி மாறும் கொண்டையையும் (அதாங்க, அவரது கிராபிக் Blog Header!) பார்க்கும்போது, அவர் மென்பொருள் வல்லுனர் என்று சொல்ல முடியும்.  இ.வ வலைப்பதிவின் பிளாக் கவுண்டர், 12 லட்சத்து 38 ஆயிரச் சொச்ச எண்ணிக்கையை காட்டுகிறது.  தமிழில் எழுதப்படும் ஒரு வலைப்பதிவுக்கு, இத்தகைய பரந்த வாசகர் வட்டத்தை இ.வ தக்க வைத்திருப்பது, மிக நிச்சயமாக ஒரு சாதனையே!

இட்லிவடையை நான் வாசிக்க ஆரம்பித்தது, நான் வலைப்பதிவு தொடங்கிய சமயத்திலிருந்து, அதாவது ஜூலை 2004-லிலிருந்து.  "பத்ரிக்கு Temporary ரஜினி ரசிகனின் கடிதம்" என்று ஆகஸ்ட் 2004-இல் ஒரு பதிவு போட்டு கொஞ்சம் சர்ச்சையாகியவுடன், அருண் வைத்தியநாதன் வேண்டுகோளுக்கிணங்க அப்பதிவை இ.வ பெருந்தன்மையாக நீக்கி விட்டார். அவர் மேல் சற்று மதிப்பும் வந்தது, தொடர்ந்து இந்த 5 ஆண்டுகளில் (தன் பதிவுகளுக்கு காட்டமான மறுமொழிகள் வந்தாலும்) அமைதியாகவும், நகைச்சுவையாகவும் பதிலளித்து வருகிறார்.  

இ.வ வுக்கு இயல்பாக நகைச்சுவை (பாடிகாட் முனீஸ்வரன் கடிதங்கள்!) கை கூடி வருவதும், அவருக்கு வெட்டி வேலை (cut & paste) பிடித்திருப்பதும், நல்ல கட்&பேஸ்ட் சமாசாரங்களை அவர் கவனத்திற்கு எடுத்து வர பல "செகரட்டரிகள்" அவருக்கு இருப்பதும், எதிலும் ரொம்ப தீவிரம் இல்லாமல் இயல்பாக இருப்பதும் இட்லிவடையின் நீண்ட வலையுலக இன்னிங்க்ஸுக்கு சில காரணங்கள் என்று நினைக்கிறேன்!

ஆரம்ப காலத்தில், நான் என் பதிவுகளில் (ஆச்சரியக்குறி) "!" அதிகம் பயன்படுத்தியதை வைத்து என்னை பயங்கரமாக ஓட்டியிருக்கிறார், அதன் விளைவாக நானும் "!"ஐ சற்று குறைவாகவே பயன்படுத்தி வருகிறேன் :) ஜெயேந்திரர் கைதின்போது நான்  எழுதிய பதிவுக்கு தனது முதல் பின்னூட்டத்தை இட்டு, எனது இப்பதிவின் கருத்துகளுடன் தனக்கு உடன்பாடு இல்லை என்றும், தனது கருத்துகளை டாப் 10 - ஜெ ஜெ சில குறிப்புகள் என்ற இடுகையில் கூறியிருப்பதாகவும் எழுதியிருந்தார். இ.வ வின் அந்தப் பதிவில் "கிருமி கண்ட சோழன்" "ரங்கராஜன் நம்பி"க்கு செய்த அநியாயத்திற்கு ஒருவர் பொங்கியெழுவதற்கு இணையான ஒரு கோபம் தெரிந்தது ! That was our first & only direct encounter :)

இட்லி வடையார் வலதுசாரி ஆதரவாளர் என்று சொல்வதில் பெரிய ஆச்சரியம் எதுவும் இல்லை.  தமிழ் வலையில் எழுதுபவர்களில் 80% பேர் வலதுசாரி சிந்தனை உடையவர்கள் தான், எல்லாரும் ஒத்துக் கொள்வதில்லை, அதான் மேட்டர்!!!   எதிர்கருத்து உடையவர்களை ராவுவதற்கும், சில சமயங்களில் 'கில்மாஸ்' ஃபோட்டோ  போடுவதற்கும் அனானிமஸாக இருப்பது இ.வ வுக்கு உதவியாக இருக்கிறது.  அதோடு, இ.வ வின் resourcefulness என்னை மிகவும் கவர்ந்த விஷயம்!  அதற்கு உதாரணம், ஒரு "மாபெரும்" வலைப்பதிவு சந்திப்பு சென்னையில் நடந்தபோது, அங்கு எடுத்த புகைப்படங்களை சந்திப்பு நடந்து கொண்டிருக்கும்போதே இட்லிவடை வலையேற்றியதைச் சொல்லலாம் :)  அவருக்கு எப்படி இவ்வளவு (தினம் update செய்வதற்கு) நேரமும், உந்துதலும் கிடைக்கிறது என்பது புதிராகவே உள்ளது.  இட்லிவடை, நிறைய சொத்து இருக்கிற, வேலைக்குப் போகத் தேவையில்லாத ஆளாக இருக்கலாம் எனபது என் அனுமானம் ;-)

2005-ஆம் ஆண்டு இறுதியில் இட்லிவடை எழுதிய 2005 டாப் டென் (- 2) வலைப்பதிவுகள் என்ற இடுகை satire வகை நகைச்சுவைக்கு ultimate எடுத்துக்காட்டு என்று கூறுவதில் எனக்கு தயக்கம் இல்லை.   தமிழ்வலையின் Alltime டாப்-5 நகைச்சுவைப் பதிவுகளில் அப்பதிவுக்கு என்றுமே இடமுண்டு, குறிப்பிட்ட பதிவில் அவர் என்னை கலாய்த்திருந்தாலும் கூட :)  அப்போது அவ்விடுகையை வாசிக்காதவர்கள் இப்போது வாசித்து விட பரிந்துரை செய்கிறேன்!

எனது வலைப்பதிவின் 301-வது இடுகையை,  என்னைப் பற்றிய ஒருவிமர்சனப் பதிவாக இட்லிவடை எழுதித் தந்தார்!  மிக நேர்மையான விமர்சனம் அது.  இறுதியாக, இட்லிவடை மேல் எல்லாருக்கும் +/- விமர்சனம் இருக்கும், அதே சமயம் No one can ignore him/her and therein lies இட்லிவடை's popularity and success !!!!!!!!!!!!!!!!!!!!!!!!!!!!!!

என்றென்றும் அன்புடன்
பாலா

460. மும்பை வன்முறையின் பின்விளைவுகள்

நேற்று எழுதிய பதிவில் சொன்னபடி, போலீசார் நவநிர்மாண் சேனா குண்டர்கள் மீது கடுமையான நடவடிக்கை மேற்கொண்டதில், இன்று மும்பையில் பெரிய அளவில் பிரச்சினை எதுவும் இல்லை என்று தெரிகிறது.  இயல்பு வாழ்க்கைக்கு பாதிப்பில்லை.  மேலும், அவரை கைது செய்தால் மும்பையில் பெரும் கொந்தளிப்பு ஏற்படும் என்றூ மகாராட்டிர அரசு பயந்தது போல, (ராஜ் தாக்கரேக்கு பொது மக்களிடையே ஆதரவு இல்லாததால்!)  இன்று எதுவும் நடக்கவில்லை என்பது குறிப்பிடத்தக்கது.

ரயில்வே தேர்வு எழுத வந்த வடக்கிந்திய இளைஞர்கள் மீது நேற்று MNS குண்டர்கள் நிகழ்த்திய வன்முறையில், ஒரு பிகாரி இளைஞர் இறந்து போனார்.  அதன் தொடர்ச்சியாக, மும்பையிலிருந்து பாட்னாவுக்கு திரும்பி வந்த மற்ற இளைஞர்கள், ரயில்வே நிலையத்தில் கலவரத்தில் ஈடுபட்டனர்.   பிரிவினைவாதத்தை முளையிலேயே கிள்ளி எறியாவிட்டால், இது போல சங்கிலித் தொடராக பல வன்முறை நிகழ்வுகள் ஏற்படக்கூடிய அபாயத்தை என் நேற்றைய பதிவில் சுட்டியிருந்தேன்.  நல்ல வேளை, வட இந்தியாவில் வேறெங்கிலும் கலாட்டா எதுவும் இல்லை!

ஒரு நல்ல செய்தியையும் இங்கு குறிப்பிடுவது அவசியமாகிறது.  அலகாபாத் மற்றும் பாட்னாவில் வசிக்கும் வட இந்தியர்கள், "காந்திகிரி" (அகிம்சை) வழியை பின்பற்ற முடிவு செய்து, அங்கு வசிக்கும் மராத்தியர்களுக்கும், அங்கிருந்து மும்பைசெல்லும் ரயில்களில் பயணம் செய்யும் மராத்தியர்களுக்கும், பூவும் இனிப்புகளும் தந்து, தாங்கள் ஒற்றுமையையும், அமைதியையும் விழைவதாகக் கூறி நல்லிணக்கத்திற்கு வழிவகை செய்துள்ளனர் !

எ.அ.பாலா

459. ராஜ் தாக்கரே என்கிற பாசிச அரக்கன்

மகாராட்டிர நவநிர்மாண் சேனா (MNS) என்கிற அராஜக/பாசிச அமைப்பின் தலைவனாக, மகாராட்டிர மாநிலத்தில் வாழ்ந்து வரும் பிற மாநிலத்தவரை கடந்த பல மாதங்களாக அச்சுறுத்தியும், அவர்கள் மீது வன்முறையைத் தூண்டி விட்டும் அரசியல் லாபம் தேடி வரும் ராஜ் தாக்கரேக்கு இப்போது மறை சுத்தமாக மறை கழண்டு விட்டது அவரது பேச்சின் மூலம் தெரிகிறது !

சமீபத்தில், மும்பையில் ரயில்வே பணிக்கு தேர்வு எழுத வந்த பிற மாநிலத்தவரை MNS குண்டர்கள் கண்மூடித்தனமாக தாக்கியதைத் தொடர்ந்து, அவரை கைது செய்ய அரசு ஆலோசித்தபோது, "என்னை கைது செய்தால் பயங்கரமான விளைவுகள் ஏற்படும்" என்றும், "என்னைக் கைது செய்தால், மகாராட்டிரமே பற்றி எரியும்" என்றும் ராஜ் தாக்கரே பிதற்றியுள்ளது!  மேலும், பிரிவினைவாதத்தை தூண்டும் வகையில், மகாராட்டிர கொங்கனில் நிலங்களை மராத்தியர் அல்லாதவர்களுக்கு விற்க வேண்டாம் என்றும் அந்த அரை லூசு பேசியிருப்பது வன்மையான கண்டனத்துக்குரியது :(

இன்று ராஜ் கைது செய்யப்பட்டுள்ளதைத் தொடர்ந்து மும்பையில் வன்முறை வெடித்துள்ளது.  MNS குண்டர்கள் தூண்டி விடும் கலவரத்தை இரும்புக்கரம் கொண்டு ஒடுக்கினால் தான், அரசியல் லாபத்துக்காக பிரிவினைவாதத்தையும், வன்முறையையும் கருவிகளாக பயன்படுத்த விழையும் போக்குக்கு சாவுமணி அடிக்க முடியும்;  சிலபல அரசியல்வியாதிகளுக்கும் பாடமாக அமையும். 

ஒரு எழவுக்கும் லாயக்கிலாத ராஜ் தாக்கரே போன்ற அரசியல்வியாதிகளுக்கு வேண்டாத விளம்பரம் தந்து, அவர்களின் உருப்படாத பேச்சுக்கு முக்கியத்துவம் அளித்து, அவர்கள் கட்டுப்படுத்த இயலா அரக்கர்களாக உருவெடுப்பதற்கு மீடியாவின் sensational journalism அணுகுமுறையும் ஒரு மிக முக்கியக் காரணம் என்றால் அது மிகையில்லை.  சமீபத்தில் அமிதாப் சாதாரண அப்பண்டிசிட்டிஸ் அறுவை சிகிச்சைக்காக மருத்துவமனை சென்றதை நேரடி ஒளிபரப்பு செய்து மீடியா அடித்த அருவருப்பான கூத்தை இதற்கு உதாரணமாகச் சொல்லலாம் :(

ஜனநாயகத்திற்கு விரோதமான இந்தப் போக்குக்கு முற்றுப்புள்ளி வைக்காவிட்டால், எதிர்காலத்தில் மோசமான விளைவுகளை நாம் சந்திக்க நேரிடும் !!

என்றென்றும் அன்புடன்
பாலா

458. கெட்ட போலீஸும் நல்ல போலீஸும்

இரண்டு வாரங்களுக்கு முன் ஜுனியர் விகடனில் வந்த கட்டுரை இது. இதை வாசித்தவுடன் மனது சற்றே கலங்கி விட்டது என்றாலும், பாதிக்கப்பட்ட பெண்மணிக்கு தக்க சமயத்தில் உதவிய ஜு.வி பத்திரிகையையும், உடனடி நடவடிக்கை எடுத்த காவல் அதிகாரியையும் மனதார பாராட்ட வேண்டும். வாசியுங்கள்:
*************************************************************
சில நாட்களுக்கு முன்பு நம்முடைய அலுவலக தொலைபேசி நீண்ட நேரம் அலற... எடுத்து ஹலோ சொன்னோம்.

உடைந்து சிதறியது ஒரு குரல்...

''சார் என் பெயர் அனுராதா... சென்னை எழும்பூரில் இருந்து பேசறேன். போன்ல பேசமுடியாத நிலைமை. எக்மோர் ரயில்வே ஸ்டேஷன் வர்றீங்களா?''

-அந்தக் குரலில் தெரிந்த பதற்றத்துக்கு மதிப்பளித்து எழும்பூர் விரைந்தோம். போனில் சொன்ன அடையாளங் களோடு அனுராதாவை சந்தித்தோம்.

''சார், இதை சொல்றதுல எனக்கு அவமானமோ கூச்சமோ இல்ல. சொல்லப்போனா,

இந்த சமூகம்தான் கூச்சப்படணும். அஞ்சு வருஷத்துக்கு முந்தி நான் விபசாரத் தொழில் செஞ்சேன். என் கணவர் தெனமும் குடிச்சுக்கிட்டே இருப்பாரு. ரெண்டு பெண் குழந்தைங்களைக் காப்பாத்தறதுக்கு வேற வழி தெரியாம ஒரு வேலைக்குப் போனேன். அங்கே என்னை வற்புறுத்தி இந்தத் தொழில்ல இறக்கிட்டாங்க.

உடம்பு முழுசும் உறுத்தலோடுதான் இந்த தொழிலையே செஞ்சேன். என் கணவர் திருந்தி வேலைக்கு போக ஆரம்பிச்சாரு. நானும் இந்தத் தொழிலை விட்டுட்டேன். நாலு வருஷமா வேற நல்ல வேலைக்குப் போய்க்கிட்டு இருக்கேன். எல்லாத்தையும் மறந்து என் வாழ்க்கையில கொஞ்சநாள்தான் நிம்மதியா இருந்தேன். ஆனா...'' என்ற அனுராதாவின் கண்கள் ஈரங்கோத்தன.

''போன ஆகஸ்ட் 25-ம் தேதி, சாயங்காலம் 6.30 மணிக்கு இரண்டு பேரு வீட்டுக் கதவைத் தட்டினாங்க. கதவைத் திறந்ததுமே உள்ள நுழைஞ்சு, 'நாங்க போலீஸ§. வீட்டை சோதனை போடனுணும்'னு சொன்னாங்க. என் பொண்ணுங்க படிச்சுக்கிட்டு இருந்துச்சுங்க. திடீர்னு அந்த ரூமை வெளிப்பக்கமா தாழ்ப்பாள் போட்டாங்க. 'சார், என் பொண்ணுங்க சத்தியமா சொல்றேன்... நான் தொழிலை விட்டுட்டேன். என்னை நம்புங்க'னு சொன்னேன். அதுல ஒருத்தர், பளாருன்னு கன்னத்துல அடிச்சாரு. 'ஏண்டி... பத்தினி வேஷம் போடறியா? உன் பசங்க படிக்கற ஸ்கூல்ல போய், நீ யாருன்னு சொல்லவா'னு மிரட்டினாரு. 'இந்த வீட்டை சீல் வச்சுட்டு, உன் மேல் கேஸ் போட்டா என்ன பண்ணுவ? நீதான் தொழில் செய்யறீயே, மாமூல் தரமாட்டீயா?'னு கேட்டாங்க. அழுது புரண்டேன். பீரோ சாவியைக் கேட்டாங்க. அது திறந்துதான் இருக்குன்னு சொன்னேன். அதுலருந்த ஏழாயிரம் ரூபாயை எடுத்துக்கிட்டாங்க. 'இது பத்தாது, மொத்தமா அஞ்சு லட்சம் கொடுடி'னு கேட்டாங்க. அவ்ளோ இல்லைன்னு சொன்னதும், மூணு லட்சம் கேட்டாங்க. கடைசியா, ஒரு லட்சம் கேட் டாங்க. பணமே இல்லைன்னு பேங்க் பாஸ் புத்தகத்தையும் காட்டிட்டேன்.

கடைசியில கழுத்துல கெடந்த தாலி செயினைக்கூட அந்தப் பாவிங்க விடல. வீட்டுக்கு வெளியே போய் இருங்கன்னு சொல்லிட்டு, பொண்ணுங்க படிச்சுக்கிட்டு இருந்த ரூமுக்கு போனேன். பெரியம்மா வீட்டு வரைக் கும் போயிட்டு வந்துடறதா சொல்லி, வெளியே இருந்த ஆளுங்களோட ஆட்டோவுல போனேன். தாலி சங்கிலியை வித்து, 30 ஆயிரத்து 450 ரூபாய் கொடுத்தேன். எனக்கு ஆட்டோவுக்காக 100 ரூபாய் கொடுத்தாங்க. வீட்டுக்கு வந்து சேர்ந்ததும் போன் செஞ்சி 'நாளைக்கு 70 ஆயிரம் தரணும். இல்லன்னா, உன் வீட்டுக்காரன்கிட்டேயும் பசங்ககிட்டேயும் விஷயத்தை சொல்லிடுவோம்'னு மிரட்டினாங்க. வேற வழியில்லாமதான் சார், உங்களுக்கு போன் பண்றேன். போலீஸ§க்குப் போனா, எனக்கு வழி கிடைக்காது'' என்ற அனுராதாவின் கண்ணீருக்கு அணை போட முடியவில்லை.

அனுராதாவின் அவலத்தை உடனே மத்திய சென்னை போலீஸ் இணை கமிஷனர் பாலசுப்பிரமணியத்துக்குத் தெரியப்படுத்தினோம். அனுராதாவிடம் போன் செய்து, 70 ஆயிரம் ரூபாய் கேட்டவனின் மொபைல் எண்ணைப் பெற்று, இணை கமிஷனரிடம் கொடுத்தோம்.

அவர் எடுத்த துரித நடவடிக்கையால், மறுநாள் 26-ம் தேதி இரவே விபசார தடுப்புப் பிரிவு போலீஸ்காரர் களான பாஸ்கரன், மனோகரன் இருவரும் பிடிபட்டனர். அதிர்ந்துபோன இணை கமிஷனர், உடனடியாக கமிஷனர் சேகர் கவனத்துக்கு இதைக் கொண்டு சென்றார்.

தொடர்ந்த விசாரணையில்... அந்த போலீஸாரோடு வக்கீல் ஒருவரும் சிக்கினார். அவர் தற்போது ஒரு அரசு வக்கீலிடம் ஜூனியராக இருந்து வருகிறார். நடந்த சம்பவங்கள் மீது விசாரணை நடத்த உத்தரவிட்டார் கமிஷனர் சேகர். இந்த விசாரணையை, மத்திய குற்றப் பிரிவு துணை கமிஷனர் விஜயகுமாரி நடத்தி முடித்து, கமிஷனருக்கு அறிக்கையாக கொடுத்திருக்கிறார்.

அனுராதாவிடம் இருந்து, 'பணப்பறிப்பு' செய்தது ஊர்ஜிதமானதும் உடனடி நடவடிக்கையாக பாஸ்கரன், மனோகரன் உட்பட சம்பந்தப்பட்ட பிரிவு இன்ஸ்பெக்டர் உதயகுமார், தலைமைக் காவலர்கள் அரிகிருஷ்ணன், குமார் ஆகியோர் டிரான்ஸ்ஃபர் செய்யப்பட்டிருக்கிறார்கள்.

பாஸ்கரனும், மனோகரனும் அனுராதாவின் வீட்டில் எடுத்த ஏழாயிரம் ரூபாயையும், மார்வாடி கடையில் விற்கப்பட்ட தாலி சங்கிலியையும் போலீஸார் மீட்டு அனுராதாவிடமே கொடுத்து விட்டார்கள்.

இதுவேதான், அண்ணா சாலையில் உள்ள ஸ்பென்சர் பிளாசாவில் இருக்கும் பியூட்டி பார்லரில் ஏற்கெனவே பணம் கேட்டு மிரட்டி மாட்டிக்கொண்ட கும்பலாம்.

நடவடிக்கைக்கு நன்றி சொல்லி, இணை கமிஷனர் பாலசுப்பிரமணியத்திடம் நாம் பேசியபோது, ''விசாரணை தொடர்கிறது. அதன் முடிவில், வேறு கடுமையான நடவடிக்கை எடுக்கப்படும்'' என்றார் உறுதியாக.

'மனசாட்சியை விற்றுப் பிழைக்கிற கேவலத்தைவிடவா கொடியது விபசாரம்?' என்ற கேள்விதான் நமக்குள் எழுகிறது!

நன்றி: ஜுனியர் விகடன்

457. ஆல்வா எடிசனுக்கு ஆற்காடு வீராசாமி அஞ்சலி - கி.அ.அ.அனானி

தமிழ் நாட்டில் தான் மின்சார உற்பத்தி பிரச்சினை இருக்கிறதே..ஏதோ நம்மாலானது..கணினியை பயன் படுத்தாமல் மின்சாரத்தை மிச்சப் படுத்தலாமே என்று ரொம்ப நாளாக டி.வி பார்க்காமலும், வலைப்பதிவுகளை லுக் உட கணனியை ஆன் செய்யாமலும் இருந்தேன் (இதுனால எனக்கோ அல்லது நாட்டுக்கோ அல்லது தமிழ் கூறும் நல்லுலகுக்கோ எந்த நஷ்டமும் இல்லை அப்படீன்னு நீங்க சொல்லுறதும் சரிதான்) .

ரொம்ப நாளுக்கு பிறகு இன்று தான் 'நிலைமை சீரடைந்து விடும்' என்று ஆற்காடு வீராசாமி கொடுத்த தைரியத்தில் ஒரு பத்து நிமிடம் டி வி பார்த்துக் கொண்டிருந்தேன். விஜய் டிவியில் 'தமிழ் பேச்சு எங்கள் மூச்சு' என்று ஏதோ ஒரு நிகழ்ச்சி .  அதில் பேச்சாளர் தாமஸ் ஆல்வா எடிசன் ( பல்ப் கண்டு பிடிச்சாரே அவர்தான்) மறைந்த தினத்தில் அமெரிக்கர்கள் "அனைத்து மின்சார விளக்குகளையும் அணைத்து" அவருக்கு அஞ்சலி செலுத்தினார்கள்.  தேவாலயத்திலும் கூட வெறும் மெழுகு வர்த்திகளை மட்டும் ஏற்றி வைத்து அஞ்சலி செலுத்தினார்கள் என்று உணர்ச்சி பொங்க பேசிக் கொண்டிருந்தார். இதைத்தான நம்ம ஆற்காடு வீராசாமி அமல் படுத்தி தமிழகத்துல தினம் தோறும் தாமஸ் ஆல்வா எடிசனுக்கு  அஞ்சலி செலுத்திக்கிட்டிருக்காரு. 

அவருடைய விஞ்ஞானத்தின் மேலான அபரிமிதமான மரியாதைக்கு ஏன் மக்கள் இப்படி அராஜகமா எதிர்ப்பு தெரிவிக்கிறாங்க அப்படீன்னு ஆச்சரியப் பட்டுக்கிட்டு அப்படியே வேறு சானலுக்கு போனால் அங்கு ஆற்காடு வீராசாமி உண்மையாகவே வீராவேசமாக சாமியாடிக் கொண்டிருந்தார், மேட்டர் என்ன என்றால் மின் வெட்டுக்காக அவரையும் முதலமைச்சரையும் பதவி விலகச் சொல்லி சில பல எதிர்க்கட்சிகள் சொல்லியிருந்ததற்கு அவர் தர்க்க ரீதியாக விளக்கம் கொடுத்துக் கொண்டிருந்தார்?!!!

"தமிழகத்தில் எம்ஜியார் காலத்திலும், பின்னர் ஜெயலலிதா காலத்திலும் மின் வெட்டு இருந்திருக்கிறது.அவர்கள் அப்போது பதவி விலகி முன்னுதாரணமாக திகழ்ந்திருந்தால் இப்போது எங்களைச் சொல்லலாம்.அப்படி அவர்கள் செய்யவில்லையே" என்று புத்திசாலித்தனமாக கேட்டுக் கொண்டிருந்தார்.  அது சரி.. "நீங்க சுயமா யோசிக்க மாட்டீங்களா? நீங்க எதுக்கும் முன்னுதாரணமாக இருக்க மாட்டீங்களா? என்று எழுந்த கேள்விகளை மனதுக்குள் அடக்கிக் கொண்டு அடுத்த சானலுக்கு போகலாம் என்று ரிமோட்டை எடுத்தால் படக்கென்று டி.வி அணைந்து விட்டது.  வேறென்ன "தாமஸ் ஆல்வா எடிசனுக்கு ஆற்காடு வீராசாமியின் இன்றைய அஞ்சலி " தொடங்கி விட்டது.

---கி.அ.அ.அனானி

456. இந்த முறை ஏன் விஜயகாந்தாக இருக்கக் கூடாது? - கி.அ.அ.அனானி

முன்னுரை: ரொம்ப ரொம்ப நாட்களுக்குப் பிறகு கி.அ.அ.அனானியிடமிருந்து ஒரு மேட்டர் மெயிலில் வந்தது. வந்து ஒரு வாரம் ஆகியும், அதை வாசித்து விட்டு இன்று தான் பதிகிறேன் ! கி.அ.அ.அ தாமதத்திற்கு கடுப்பாக மாட்டார் என்று நினைக்கிறேன். கடந்த வாரம் முழுதும் ஆபிஸில் ஒரே ரென்ஷன் !!! இன்னும் சில மேட்டர்களும் அவர் அனுப்பியிருக்கிறார். வாசித்து சென்சார் செய்த பின், அவையும் பிரசுரிக்கப்படும் :) எப்போதும் போல், பின்னூட்டங்களுக்கு அவரே பதில் தருவார், அதாவது கி.அ.அ.அ will stand and play :) கி.அ.அ.அ மேட்டர் கீழே:
**************************************************

ஆயிற்று ...அனேகமாக இந்த வருட கடைசியில் பாராளுமன்றத் தேர்தல் வந்தே விடும் என்று எல்லா தரப்பிலும் பேசத் துவங்கி விட்டனர். கட்சிகள்அதற்கான கூட்டணிகளிலும்,தேர்தல் வியூகங்களிலுமிறங்கத் தயாராகி விட்டனர்.தமிழகத்திலும் சில விலகல்களும் ஈர்த்தல்களும் சேர்த்தல்களும் ,அறிவிப்புகளும் நடக்கத் தொடங்கி விட்டன.கருணாநிதியும் நாளொரு இலவசம், பொழுதொரு திட்டம் எனத் தயாராகி விட்டார். ஜெ தரப்பில் சுறு சுறுப்பாக அறிக்கைகளும், காஸ் விலை முதல் கக்கூஸ் அடைத்துக் கொண்டது வரையிலான அனைத்து விஷயங்களுக்கும் மறியல் போராட்டங்கள் என போய்க்கொண்டிருக்கிறார்கள்.

அரசியலில் நிரந்தர நண்பனும் கிடையாது..நிரந்தர எதிரியும் கிடையாது என்பது எழுதப்படாத விதியாக இருந்தாலும் கூட ஓட்டு அரசியலுக்கு ஏற்றவாறு அமையும் சில கூட்டணி முடிவுகளை ஒரு தேர்தல் வரையாவது அனுமானிக்க முடியும்.

உதாரணமாக வரும் தேர்தலில் பமக திமுக உறவு என்பது நடவாத ஒரு விஷயம் .

அதே போல திமுகவும் காங்கிரஸுடனான தங்களது உறவுக்காக ( தமிழகத்தில் மீதமுள்ள மூன்றாண்டு ஆட்சிக் காலத்தையும் கணக்கில் கொண்டே கூட்டணியை நீட்டிக்க தி மு க ஆவல் கொண்டுள்ளது) கம்யூனிஸ்டுகளை உதறத் தயாராகி விட்டனர்.

கம்யூனிஸ்டுகளைப் பொறுத்த வரை இந்தத் தேர்தலில் அவர்களுக்கு பெரியதாக எந்த சாய்ஸும் இல்லை. பாஜக இல்லாத அதிமுக கூட்டணி அல்லது ஒரு மூன்றாவது கூட்டணி என்பதில் இரண்டில் ஒன்றுதான் இவர்களது முடிவாக இருக்கமுடியும்( தனித்துப் போட்டி என்ற தற்கொலை முயற்சியை தவிர்த்து)

அதிமுகவைப் பொறுத்தவரை கம்யூனிஸ்டுகளா / பாஜகவா என்று வரும் போது அவர்கள் கம்யூனிஸ்டுகளைத்தான் தேர்ந்தெடுப்பர்.அதில்தான் அவர்களுக்கு ஆதாயம்.கம்யூனிஸ்டுகளுக்கு தொழிற்சங்கங்களில் உள்ள செல்வாக்கு மற்றும் உறுப்பினர் பலம் இரண்டும் பஜகவிற்கு தமிழகத்தில் கிடைக்கும் ஓட்டுக்களை விட அதிகம் என்பது கண்கூடு.அதுவும் தவிர தேர்தலுக்கு பின் ஒரு வேளை பஜக அரசு அமையும் பட்சத்தில் ஜெயலலிதா எந்த குற்ற உணற்வோ அல்லது கூச்சமோ இல்லாமல் கம்யூனிஸ்டுகளை கை கழுவி விட்டு பா ஜ க அரசில் ஐக்கியமாகி விடும் சந்தர்ப்பம் மிக அதிகம் ( இதற்குத் தேவை சில எம் பிக்கள் மட்டுமே) ஆட்சியமைக்க எண்ணிக்கை குறையும் பட்சத்தில் பாஜகவும் இவர்களை இரு கரம் கூப்பி வரவேற்பார்கள் என்பதும் திண்ணம்.

மற்ற கட்சிகளைக் கணக்கில் கொண்டால் வைகோ அனேகமாக இந்த பாராளுமன்றத் தேர்தல் வரை அதிமுகா கூட்டணியில்தான் இருப்பார்( இதற்கு இன்னும் ஒரு முக்கிய காரணம் செஞ்சி ராமசந்திரன் குழுவை தி மு க ஆதரித்து மதிமுகவை உடைக்க முயன்றது..அதனால் அதிமுகவுடன் சீட் பேரம் படியாவிட்டாலும் கூட இந்தத் தேர்தல் முடியும் வரையிலாவது வைகோ கலைஞர் தோளில் சாய்ந்து பழங்கதை பேசி கண்ணீர் விடும் நாடகம் அரங்கேர வாய்ப்பில்லை.)

பமகவைப் பொறுத்த மட்டில் இந்தத் தேர்தலில் தனித்துப் போட்டி என்ற தற்கொலை முடிவைத் தவிர அவர்களிடம் உள்ள ஒரே சாய்ஸ் அதிமுகவுடன் இணைந்து தேர்தலை சந்திப்பதுதான்.(ஏனெனில் விஜயகாந்துடன் இணைந்தால் கூட்டணியில் யார் பெரியண்ணன் என்று ஏற்படும் முரண்பாட்டை அவர்கள் தவிர்க்கவே விரும்புவார்கள்...அடுத்த தேர்தல் வரையிலாவது)இதனாலேயே அதிமுகவை நோக்கிய தங்களது காய் நகர்த்தலை தொடங்கி விட்டனர்.

இப்படிப்பட்ட சூழலில் எந்தக் கட்சிக்கு ஓட்டுப் போடுவது என்பது மில்லியன் டாலர் கேள்விதான்.

கருணாநிதி போன தேர்தலில் இரண்டு ரூபாய் அரிசியும் இலவச கலர் டி வி யும் , ஒட்டுப் போட்ட துணிபோல கொள்கையில்லாத கூட்டணியும் ஆட்சியைப் பெற்றுத்தந்தது போலவே இந்த முறையும் செய்து விடலாம் என்ற நம்பிக்கையில் அறிவிப்புகளையும் ஒரு ரூபாய்க்கு கிலோ அரிசி,50 ரூபாய்க்கு 10 மளிகை சாமான் என்பது போல பம்மாத்துத் திட்டங்களை அள்ளி விடத் தொடங்கி விட்டார்..தனது /காங்கிரஸ் ஆட்சியின் தோல்விகளும் ,வாரிசு அரசியலால் ஏற்பட்டுள்ள கெட்ட பெயராலும், கூட்டணியின் விரிசல்களாலும் ஆட்சியின் அடித்தளம் ஆடிப் போயிருப்பதை அவர் உணர்ந்தே இருக்கிறார்.

காங்கிரசையும் ஆட்சியையும் தக்க வைத்துக் கொள்ள மாநிலத்திலும் கூட்டணி ஆட்சியையும் அறிவித்து விடுவார் போலத்தான் தெரிகிறது.அதில் கோஷ்டி சண்டையும் பூசலும் குழப்பமும் அன்றி வேரெதுவும் மிஞ்சப் போவதில்லை.மத்தியிலும் மாநிலத்திலும் ஆட்சியில் ஒரு சேர அதிகார பலம் மிக்க பதவிகள் கிடைத்தும் மக்களுக்காக ஒன்றும் கிழிக்காதவர்கள், உருப்படியாக எந்த ஒரு மக்கள் நல தொலை யோக்கு திட்டத்தையும் நிறைவேற்ற லாயக்கற்றவர்கள் அடுத்த முரை வெற்றி பெற்றால் என்ன சாதித்து விடப் போகிறார்கள். அதிலும் மத்தியிலோ அல்லது மாநிலத்திலோ ஒரு இடத்தில் இவர்களது ஆட்சியும் மற்ற இடத்தில் எதிர் அணி ஆட்சியோ இருந்து விட்டால் கேட்கவே வேண்டாம். இவர்களுக்கு ஓட்டுப் போடுவது பாலுக்காக மலட்டு மாட்டை வாங்குவது போன்றது.

ஜெயலலிதாவைப் பொருத்த வரை அவருக்கு ரெட்டிப்பு சந்தோஷம்.ஏதோ பிக்ஸட் டெபாஸிட்டில் போட்டிருந்த பணம் 5 வருடம் கழித்து மெச்சூராகி கைக்கு வருவது போல் அடுத்து எனதாட்சிதான் என்று சொல்லிக் கொண்டு அலைகிறார்...போன முறை ஆட்சியில் இருந்த போது நான் என்ன சாதித்தேன்..இப்போது எதிர்க்கட்சியாக என்ன கிழித்தேன் என்பதெல்லாம் இவருக்கு ஒரு பொருட்டே இல்லை. கருணாநிதியின் மாற்று நான் மட்டுமே என்பதாக மமதையில் அலைகிறார்.இதனால் இவருக்கு ஓட்டுப் போட்டால் என்ன மாதிரியான விஷயங்கள் நடந்தேரும் என்பது கிட்டத்தட்ட உணரமுடிகிறது. இவர்களுக்கு ஓட்டுப் போடுவதென்பது கிட்டத்தட்ட உயிர் போகும் என்று தெரிந்தே கழுத்தை அறுத்துக் கொள்வதற்கு ஒப்பாகும்.

இதற்கு ஒரே மாற்று தமிழகத்தில் ஒரு மூன்றாவது அணி உருவாவதே ஆகும்.அந்த மூன்றாவது அணியை உருவாக்கக் கூடிய ஒரே நம்பிக்கை இந்தத் தேர்தலைப் பொறுத்த மட்டிலும் விஜயகாந்த் மட்டுமே. விஜயகாந்த் காங்கிரஸ், கம்யூனிஸ்ட் மற்றும் பா.ம.க ஆகியோரை ஒருங்கிணைத்து தேர்தல் களத்தில் மூன்றாவது அணியாக களம் இறங்குவது என்பது திமுக, அதிமுக ஆகிய இரண்டு கட்சிகளுக்கும் மாற்றாக ஒரு ஆட்சியை தரவல்ல சூழலை ஏற்படுத்துவதோடு, கேப்டனின் முதலமைச்சர் கனவுக்கும் அது ஏற்றமாதிரி அமையும்.

விஜகாந்திடம் கொள்கை இருக்கிறதா?அனுபவம் இருக்கிறதா? நடிகர் அப்படி இப்படி என்று ஏகப்பட்ட கேள்விகளையும் ஆட்சேபணைகளையும் வீசலாம்.ஆனால் அதையெல்லாம் கடந்து இந்த அதிமுக, திமுக என்ற இரு நோய்களையும் கட்டுப் படுத்தக் கூடிய ஒரு இடைக்கால நிவாரணி என்ற அளவிலாவது அவருக்கு ஒரு சந்தர்பம் தருவதில் எந்தத் தவறும் இல்லை.விஜயகாந்த் தவறுகள் செய்திருக்கலாம்.ஆட்சி அனுபவமோ அல்லது அரசியல் தந்திரமோ,புள்ளி விவரங்களோ ,பேச்சு வன்மையோ பெற்றவராக இல்லாதிருக்கலாம்.ஆனால் இது வரை ஆட்சியில் இருந்த யாரும் புனிதருமல்ல,பிறவி மேதைகளாக வானத்திலிருந்து குதிக்கவும் இல்லை.அதனால் விஜயகாந்தும் வெற்றி பெற்று பின் அரசியல் அனுபவம் பெறுவதனால் எந்த குடியும் முழுகி விடப் போவதுமில்லை.

அவரது நிறைகள் என்று பார்த்தோமானால்

ரஜினிகாந்த் மாதிரி இத்தனை ரசிகர் பலம் இருந்தும் , ஜெயிப்போம் என்ற நிலைமை இருந்தும் அரசியலில் இறங்கலாமா வேண்டாமா என யோசித்துக் கொண்டு வெறும் "வாய்ஸ்" மட்டும் கொடுத்துக் கொண்டிருக்காமல் துணிந்து இறங்கியது.

ஏதாவது ஒரு கட்சியில் தன்னை இணைத்துக் கொண்டு பதவிகளும் மற்ற பிறவற்றையும் அனுபவிக்கும் நிலை இருந்தும், சரியோ தவறோ தனிக் கட்சி ஆரம்பித்து நடத்துவது

அப்படி ஆரம்பித்த கட்சியை வெற்றிகரமாக 4 ஆண்டுகளாக நடத்துவது

எந்தக் கட்சியுடனும் கூட்டணி கிடையாது என்று சொன்னதுமில்லாமல் இரண்டு தேர்தல்களில் தனித்தே போட்டியிட்டுக் காட்டியது

இன்ரைய காலகட்டத்தில் கருணாநிதி, ஜெயலலித என்ற இருவரையும் ஒரே நேரத்தில் எதிர்க்கும் ஓரளவு பெயரெடுத்த ஒரே கட்சி விஜயகாந்தின் கட்சி மட்டுமே

ராமேஸ்வரம் மீனவர் பிரச்சனை போன்ற சில விஷயங்களுக்காக் இவர் நடத்திய போராட்டங்கள் அரசையே சற்றே நிமிர்ந்து பார்க்கச் செய்துள்ளதென்பதும் உண்மை

அதனால் தான் சொல்கிறேன்..இந்த முறை ஏன் விஜயகாந்தாக இருக்கக் கூடாது ???

455. மங்களூர்-உடுப்பி மதக்கலவரம்

ஒரிஸாவில் இப்போது தான் நிலைமை ஓரளவு கட்டுக்குள் வந்திருக்கிற நேரத்தில், மங்களூரிலும் உடுப்பியிலும் கலவரம் வெடித்துள்ளது.  மதமாற்றத்திற்கு எதிர்ப்பு தெரிவிப்பதாக கூறிக்கொண்டு சில இந்து அமைப்புகள் கலவரத்திற்கு தூபம் போட்டுள்ள செயல் கடுமையான கண்டனத்துக்குரியது.  கர்னாடகாவில் முதன்முறையாக ஆட்சியைப் பிடித்துள்ள பிஜேபி இது போன்ற கலவரங்களை வேடிக்கை பார்க்காமல், முளையிலே கிள்ளி எறிய வேண்டும்.  தீவிர இந்துத்வா முத்திரை குத்தப்படுவதால் பிரச்சினைகள் அதிகமாகின்றனவே அன்றி சுமுகமான தீர்வுகள் பிறப்பதில்லை !

New Life Fellowship என்ற கிறித்துவ அமைப்பு, இந்துக் கடவுளர்களை சிறுமைப்படுத்தும் விதத்தில் பிரசுரங்கள் தயாரித்து விநியோகித்தது தான் தேவலாயங்கள் மீது நடந்த தாக்குதல்களுக்கு மூல காரணம் என்று சில இந்து அமைப்புகள் கூறுகின்றன.  எது எப்படியிருந்தாலும், சட்டத்தை கையில் எடுத்துக் கொள்வது சரியாகாது, இந்த சகிப்புத்தன்மையற்ற போக்கு கண்டனத்துக்குரியது ! 

கர்னாடகா அரசு சற்று சுதாரித்துக் கொண்டு பலரை கைது செய்துள்ளது. போலீஸ் பந்தோபஸ்த்தையும் அதிகரித்துள்ளது. முதல்வர் எட்டியூரப்பா, சேதம் அடைந்துள்ள தேவாலயங்களை சீரமைக்கும் செலவை அரசு ஏற்றுக் கொள்ளும் என்று கூறியுள்ளார்.  உருப்படாத காங்கிரஸ் மற்றும் தேவகௌடாவின் ஜனதா தள தலைவர்கள், கர்னாடகாவின் உள்துறை அமைச்சர் பதவி விலக வேண்டும் என்று பேசியிருக்கின்றனர்.  சிவராஜ் பாட்டில் போன்ற ஒரு மத்திய உள்துறை அமைச்சரை வைத்துக் கொண்டு வக்கற்ற காங்கிரஸ் கட்சிக்கு இத்தனை திமிர் ஆகாது !!! 

எ.அ.பாலா

454. தில்லியில் தொடர் குண்டுவெடிப்பும் துப்பு கெட்ட அரசும்

இன்று மாலை 6.15 மணி அளவில் சுமார் 45 நிமிடங்களில் தில்லியில் 5 இடங்களில் குண்டு வெடித்ததில், இது வரை வந்த செய்திகளின்படி, சுமார் 20 பேர் பலியாயினர், 90 பேர் காயம். கரோல் பாக், பரகாம்பா ரோடு, கன்னாட் பிளேஸ், கிரேட்டர் கைலாஷ் ஆகிய இடங்களில் மார்க்கெட் பகுதியில் குண்டுகள் வெடித்துள்ளன. டிவி செய்திகளில், சிதறடிக்கப்பட்டவர்களையும், அடிபட்டு உயிருக்குப் போராடிக் கொண்டிருந்த அப்பாவி பொதுமக்களையும் பார்த்தபோது நெஞ்சம் கனத்துப் போனதோடு, இரக்கமற்ற தீவிரவாத அரக்கர்கள் மீதும், காலணாவுக்கு பிரயோஜனம் இல்லாத, பொறுப்பில்லாத, திடமில்லாத அரசு சார்ந்த அமைப்புகள் மீதும் அசாத்திய கோபம் ஏற்பட்டது.

தொடர்ந்து, ஜெய்ப்பூர், பெங்களூர், அகமதாபாத் என்று தீவிரவாதம் திட்டம் தீட்டி துல்லியமாக நாட்டிற்கு பெரும் சேதம் ஏற்படுத்தியும், உருப்படியாக எந்த ஒரு ஆக்ஷனும் எடுக்கத் துப்பில்லாமல், சதாசர்வ காலமும், அணுஆயுத ஒப்பந்தம் நிறைவேற்றுவது ஒன்றை மட்டுமே தனது வாழ்க்கைக் குறிக்கோளாக கொண்டு செயல்பட்டு வரும் பிரதமரும், அவரது லாயக்கற்ற சகாக்களும் தான் இந்த அவல நிலைக்கு முழு பொறுப்பு :(

தீவிரவாததிற்கு எதிராக மத்திய அரசு தானும் எந்த ஒரு திடமான முடிவும் எடுக்காமல், பெருமளவு பாதிப்புக்கு ஆளான குஜராத்தில் மோடி தீவிரவாதத்தை ஒடுக்க எடுத்து வந்திருக்கும் சட்டத்தை எதிர்த்து நீதிமன்றத்துக்கு சென்றுள்ள கேவலமான செயல் குறித்து என்ன சொல்வதென்று தெரியவில்லை !!!

அநியாயமாக உயிரிழந்த அப்பாவிகளுக்கு என் அஞ்சலியையும், நாடாளும் தகுதியற்ற இந்த மத்திய அரசுக்கு எதிரான என் கடுமையான கண்டனங்களையும் பதிவு செய்கிறேன்.

எ.அ.பாலா

453. சென்னையின் நாதியற்ற புராதானச் சின்னங்கள்

சென்னையின் புராதானச் சின்னங்களான பல ஆங்கிலேய காலத்துக் கட்டடங்கள் (Heritage buildings) பராமரிப்புக்கான சரியான அரசு திட்டம் இல்லாததால், நாதியற்று சீரழிந்து சிதிலமடைந்து (அல்லது இடிக்கப்பட்டு!) வருகின்றன. சென்னையில் 200-க்கும் மேற்பட்ட (100 ஆண்டுகளுக்கு மேல் பழமை மிக்க) வரலாற்று சிறப்பு மிக்க கட்டடங்கள் இருந்தும், இவற்றைப் பாதுகாக்க சட்டம் (Heritage act) எதுவும் இதுவரை இயற்றப்படவில்லை என்பது குறிப்பிடத்தக்கது.

இவற்றில் சில மக்கட் போராட்டத்தால் காப்பற்றப்பட்டிருப்பினும், அவற்றை பாதுகாப்பது குறித்து யாரும் கவலைப்படுவதில்லை :( சென்னை தனது வரலாற்று சிறப்பு மிக்க நினைவுச் சின்னங்களை (கேட்பார் / கவனிப்பார் அற்று) கொஞ்சம் கொஞ்சமாக இழந்து வருகிறது.

1. கோகலே கூடம்: 94 வருடங்கள் பழமையான இதன் உட்பகுதிகள், நீதிமன்றத்தின் தடை (இன்று) வருவதற்கு முன்பாகவே, இடிக்கப்பட்டு விட்டன. YMIA-இல் உள்ள சிலரது பண ஆசைக்கு இது பலியாகி விட்டது. பெசண்ட் நினைவுக் கட்டடம் (Besant Memorial Building) என்றும் அழைக்கப்படும் இது ஆர்மேனியன் தெருவில் உள்ளது. இந்த இடத்திலிருந்து தான் அன்னி பெசண்ட் அம்மையார் சுயாட்சிக்கான போராட்டத்தை தொடக்கி வைத்தார் என்பது குறிப்பிடத்தக்கது. "விழித்தெழு இந்தியா" என்ற தலைப்பில் வரலாற்று சிறப்பு மிக்க தொடர் உரைகளை அன்னி பெசண்ட் அம்மையார் இதே கூடத்திலிருந்து தான் நிகழ்த்தினார்!

இது 30000 சதுர அடி பரப்பளவு கொண்ட மூன்று மாடிக் கட்டடம் இது. 1916-இல் இவ்விடத்தில் சுயாட்சி லீக் தொடங்கப்பட்டது. கோகலே கூடத்தில் மகாத்மா காந்தி, தாகூர், சத்தியமூர்த்தி போன்றோர் பிரசித்தி பெற்ற எழுச்சி உரைகளை ந்கழ்த்தியுள்ளனர். அன்னி பெசண்ட் அம்மையார் 'மதராஸ் பாராளுமன்றம்' (Madras Parliament) என்ற இயக்கத்தைத் தொடங்கினார். அவ்வியக்கமே, VK கிருஷ்ணமேனன், KC ரெட்டி (கர்னாடகாவின் முதல் முதல்வர்), R வெங்கட்ராமன் போன்றோருக்கு பயிற்சிக்களமாக விளங்கியது.

அது போலவே, 1940, 1950களில் பிரசித்தி பெற்ற கர்னாடக இசை மேதைகளான முசிரி சுப்ரமணிய ஐயர், அரியகுடி ராமானுஜ அய்யங்கார், மதுரை மணி ஐயர், ராஜரத்தினம் பிள்ளை, GN பாலசுப்ரமணியம், KP சுந்தராம்பாள், DK பட்டம்மாள் போன்றொர் இங்கு இசை நிகழ்ச்சிகளை நடத்தியுள்ளனர்.

இப்போது அதன் புராதனத்தன்மை குன்றா வண்ணம், அதன் வெளிப்புறத்தையாவது சீரமைக்க முடியுமா என்று YMIA-வில் நல்லவர் யாராவது யோசிப்பார் என்று நம்புவோம் !

இந்திய விடுதலைப் போராட்டத்துடன் தொடர்புடையதும், பாரம்பரியச் சிறப்பு மிக்கதுமானவற்றின் மீது கூட அக்கறை இல்லாத நாமெல்லாம் உருப்படுவோமா ? :(

2. அட்மிரால்டி ஹவுஸ்: சட்டமன்ற உறுப்பினர் விடுதி அமைந்துள்ள அரசு எஸ்டேட் வளாகத்தில் இருக்கும், 208 வருட பாரம்பரியமிக்க இந்த கட்டடத்தை, அரசு மனது வைத்திருந்தால் காப்பாற்றியிருக்கலாம். அடிப்படை பராமரிப்பு கூட இல்லாமல் சீரழிந்து போய் இடிந்து விழும் நிலைக்குத் தள்ளப்பட்ட இக்கட்டடம் தற்போது இடிக்கப்பட்டு வருகிறது. அவ்விடத்தில், ரூ.200 கோடி செலவில் சட்டமன்ற வளாகம் கட்டப்படவுள்ளது.

3. காவல் தலைமையகம், மெரினா: INTACH (Indian National Trust for Art and Cultural Heritage) என்ற அமைப்பும், சில புராதான ஆர்வலர்களும் சேர்ந்து நீதிமன்றத்துக்குச் சென்று தடை வாங்கியதால், ஆங்கிலேயக் கட்டடக் கலையின் (Colonial Architecture) சிறப்பை நேர்த்தியாக வெளிப்படுத்தும், 70 வருட பழமையான இக்கட்டடம், இடிக்கப்படுவதிலிருந்து தப்பித்தது. 1996-இல் புதுப்பிக்கப்பட்டது.

4. ராணி மேரிக் கல்லூரி, மெரினா: 110 ஆண்டுகள் பழமையான இவ்வளாகக் கட்டடங்களை இடித்து விட்டு அங்கு புத்தம்புது சட்டமன்ற வளாகம் அமைக்க அப்போதைய முதல்வர் ஜெ தீட்டிய திட்டம் ஆசிரியர்-மாணவி கூட்டணியின் போராட்டத்தால் கைவிடப்பட்டது. கடற்கரைப் பகுதியில் உள்ள கட்டடங்களை இடிப்பதற்கு, மத்திய அரசின் சுற்றுச்சூழல் அமைச்சகத்தின் அனுமதியை பெற்றாக வேண்டிய சட்ட திருத்தம் கொண்டு வரப்பட்டது. அமைச்சர் TR.பாலு ஜெயலலிதாவை தோற்கடிப்பதற்காக இந்த நடவடிக்கையை மேற்கொண்டார் என்றாலும், இந்த புராதானச் சின்னம் காப்பாற்றப்பட்டதில் பலருக்கும் மகிழ்ச்சியே.

5. பாரத் இன்சூரன்ஸ் கட்டடம், அண்ணா சாலை: 1897-இல் "கார்டில் பில்டிங்" என்ற பெயரில் கட்டப்பட்ட இது, இந்தோ-சரசெனிக் கட்டடக்கலைக்கு (Indo-Saracenic architecture) ஓர் அற்புதமான வரலாற்றுச் சான்றாக, இன்றும் நின்று கொண்டிருக்கிறது. இதன் உரிமையாளரான LIC நிறுவனம், ஆகஸ்ட் 2006-இல் (பராமரிப்பு மற்றும் புதுப்பிக்கும் செலவு அதிகமாகிறது என்ற காரணத்துடன்!) இதை இடிக்க முற்பட்டபோது, INTACH நீதிமன்றம் சென்று இடிப்பதை தடுத்து நிறுத்தியது. தற்போது இக்கட்டடம், கொஞ்சம் கொஞ்சமாக சீரமைக்கப்பட்டு வருகிறது.

உங்களுக்காக, இன்னும் சில புராதானச் சின்னங்களின் புகைப்படங்கள்:

விவேகானந்தர் இல்லம் (1842)


ரிப்பன் கட்டடம் (1913)


சாந்தோம் சர்ச் (பதினாறாம் நூற்றாண்டு)


தியோசாபிகல் ஸொஸைடி (அடையாறு)


செனேட் இல்லம் (1874, சென்னைப் பல்கலைக்கழக வளாகம்)

எ.அ.பாலா

சில புகைப்படங்களுக்கு நன்றி:
http://timkarolsvoboda.blogspot.com
http://flickr.com/photos/bratboy76/

452. அந்தோணிக்கு சக்கர நாற்காலி கிடைத்து விட்டது!

எனது இந்தப் பதிவில் இட்ட வேண்டுகோளின் தொடர்ச்சியாக நமது தமிழிணைய நல்ல உள்ளங்களின் ஆதரவோடு திரட்டிய தொகையைக் கொண்டு வாங்கிய (பாட்டரியால் இயங்கும்) சக்கர நாற்காலி நேற்று நண்பர் அந்தோணியிடம் ஒப்படைக்கப்பட்டது. இந்த தானியங்கி சக்கர நாற்காலியின் வாயிலாக அவரால் தானாகவே வெளியிடங்களுக்குச் சென்று வர இயலும். ஒரு முறை பாட்டரியை சார்ஜ் செய்தால், 7 கி.மீ வரை பிரயாணிக்க இயலும். அந்தோணிக்கு சக்கர நாற்காலி கிடைத்ததில் மிக்க மகிழ்ச்சி என்பது அவர் என்னிடம் தொலைபேசியதிலிருந்தே தெரிந்தது!

இந்த சமயத்தில் பொருளுதவி செய்த அன்பு நண்பர்களுக்கும், அந்தோணியை வாழ்த்திய அன்பர்களுக்கும் என் நன்றியைத் தெரிவிக்கிறேன்.

இதற்கு முன்னால், அந்தோணிக்கு நமது கூட்டு முயற்சியின் வாயிலாக ஒரு மடிக்கணினி வாங்கித் தரப்பட்டது. அது தொடர்பான எனது பதிவையும் வாசிக்கவும். இதன் வாயிலாக, அந்தோணி வீட்டிலிருந்தபடியே கணினி சார்ந்த பணி ஒன்றை மேற்கொண்டு (working from home) தன் தேவைகளுக்கு வேண்டிய பணத்தை சம்பாதிக்க முடிகிறது.

உங்கள் பிரார்த்தனைகளும் வாழ்த்துக்களும் அந்தோணி மென்மேலும் வளர்வதற்கு ஊக்கத்தையும், உற்சாகத்தையும் அளிக்கும் !

அந்தோணியின் தமிழ் வலையகம் இது

என்றென்றும் அன்புடன்
பாலா

451. தமிழ் வலைப்பதிவுகளில் முதன்முறையாக - இட்லிவடையை முந்திய பாலா

ரஜினியின் சுயநலம்-சரத்குமார், தமிழர்களுக்கு அவமானம்-சத்யராஜ்

சென்னை: தனது படம் கர்நாடகத்தில் ஓட வேண்டும் என்ற ஒரே காரணத்திற்காக ரஜினிகாந்த் மன்னிப்பு கேட்டுள்ளது அவரது சுய நலத்தையே வெளிப்படுத்துகிறது என்று நடிகர் சங்கத் தலைவர் சரத்குமார் கூறியுள்ளார்.

குசேலன் படம் கர்நாடகத்தில் சிக்கல் இல்லாமல் ரிலீஸாக வேண்டும் என்பதற்காக கன்னட அமைப்புகளிடம், தான் ஓகனேக்கல் விவகாரம் குறித்து சென்னையில் பேசியது தவறு, இனிமேல் அப்படிப் பேச மாட்டேன், பேசியதற்காக வருத்தம் தெரிவிக்கிறேன் என்று நேரடியாக மன்னிப்பு என்ற வார்த்தையைப் பயன்படுத்தாமல் வருத்தம் தெரிவித்துள்ளார் ரஜினிகாந்த்.

இது திரையுலகில் சலசலப்பை ஏற்படுத்தியுள்ளது. ரஜினி சுயநலமாக பேசியுள்ளார் என்று நடிகர் சங்கத் தலைவர் சரத்குமார் தாக்கியுள்ளார்.

இதுகுறித்து அவர் கூறுகையில், தான் பேசியது தவறு என்று ரஜினி கூறியுள்ளார். அவர் இங்குதான் வளர்ந்தார். இப்படிப்பட்ட நிலையில், வருத்தம் தெரிவிப்பதாக ரஜினி கூறியிருப்பது தேவையில்லாத ஒன்று.

தனது படம் ஓட வேண்டும் என்ற ஒரே காரணத்திற்காக ரஜினி வருத்தம் தெரிவித்திருந்தால் அது நிச்சயம் சுய நலம்தான். இது தவறான பேச்சு என்றார் சரத்குமார்.

தமிழர்களுக்கு அவமானம்-சத்யராஜ்:

ரஜினியின் வருத்தம் குறித்து சத்யராஜ் கருத்து தெரிவிக்கையில், ரஜினிகாந்த் மன்னிப்பு கேட்டிருப்பதன் மூலம் தன்னையும், தன்னை வாழவைத்த தமிழக ரசிகர்களையும் அவமானப்டுத்தி விட்டார்.

என்னை பொறுத்தவரை முன் வைத்த காலை நான் பின் வைக்க மாட்டேன். இதுபோன்ற ஒரு நிலைமை நான் நடித்த படத்திற்கு ஏற்பட்டிருந்தால், தயாரிப்பாளர் நஷ்டபடக் கூடாது என்பதற்காக என் சம்பளத்தை குறைத்துக் கொண்டிருப்பேன் என்றார்.

பரந்த மனப்பான்மை-பாரதிராஜா:

இயக்குநர் பாரதிராஜா கூறுகையில், ரஜினிகாந்த் வருத்தம்தான் தெரிவித்திருக்கிறார். மன்னிப்பு கேட்கவில்லை. தயாரிப்பாளர்கள், முதலீட்டாளர்கள் பாதிக்கப்படக் கூடாது என்பதாலும், கர்நாடகத்தில் உள்ள அவருடைய ரசிகர்கள் பாதிக்கப்படக்கூடாது என்பதற்காகவும் பரந்த மனப்பான்மையுடன் அவர் வருத்தம் தெரிவித்து இருக்கிறார் என்றார்.

நியாயம்தான்-கலைப்புலி சேகரன்:

தயாரிப்பாளர் கலைப்புலி சேகரன் கூறுகையில், தனிப்பட்ட முறையிலோ, தனி மனிதராகவோ அவர் மன்னிப்பு கேட்கவில்லை. தயாரிப்பாளர், விநியோகஸ்தர், தொழில்நுட்ப கலைஞர்கள் ஆகியோர் பாதிக்கப்படக் கூடாது என்பதற்காக தொழில் ரீதியாக அவர் வருத்தம் தெரிவித்திருப்பதில் நியாயம் உள்ளது. இதைக் கண்டிப்பது சரியல்ல என்றார்.

இந்து மக்கள் கட்சி கண்டனம்:

இந்து மக்கள் கட்சி மாநிலச் செயலாளர் செந்தில்குமார் விடுத்துள்ள அறிக்கையில்,

ஒகேனக்கல் குடிநீர் பிரச்சினைக்காக தமிழ் திரைப்படத்துறையினர் நடத்திய உண்ணாவிரதத்தில் நடிகர் ரஜினிகாந்த் மிக உணர்ச்சிப்பூர்வமாக பேசினார். அவரது ரசிகர்கள் மற்றும் பொதுமக்களை உசுப்பேற்றி பரபரப்பு செய்தியாக்கினார்.

ஆனால் இன்றோ தனது குசேலன் படத்துக்கு கர்நாடகத்தில் ஒரு சில கன்னட வெறியர்களால் மிரட்டல் ஏற்பட்டு அதனால் திரையிட முடியாமல் போய் விடுவோ என்ற அச்சத்தில் கர்நாடக மக்கள் தனக்கு பாடம் புகட்டி விட்டார்கள். இனிமேல் அதுபோல் பேச மாட்டேன் என்று தார்மீக மன்னிப்பு கேட்டுள்ளார். இது ஒட்டுமொத்த தமிழக மக்களையே அவமானப்படுத்தக் கூடிய செயலாகும்.

தமிழக மக்களையும், இளைஞர்களையும் தனது ரசிகர்களாக கொண்டு கோடிக்கணக்கான ரூபாய் சம்பாதித்த ரஜினி தான் ஒரு கன்னடர் என்பதை நிரூபித்துள்ளார்.

தனது திரைப்படத்தின் மூலம் இளைஞர்களுக்கு ஒரு நல்ல கருத்தையும் அவர் சொன்னதில்லை. வியாபாரரீதியாக திரைப்படத்தில் வாங்கும் சம்பளம் ரூ.20 கோடிக்கு நஷ்டம் வந்து விடுவோ என்று அவர் அச்சப்படுகிறார்.

உண்ணாவிரதத்தில் தமிழகத்துக்கு ஆதரவாக ஆவேசமாக கன்னட வெறியர்களுக்கு எதிராக பேசிய பேச்சுக்களை திரும்பப் பெற ரஜினிகாந்த் வாய் சொல்லில் வீரர் என்பதை நிரூபித்துள்ளார்.

எனவே அவர் தமிழகத்தை விட்டு வெளியேற வேண்டும். தான் சம்பாதித்த வியாபார தளமாக தமிழகத்தையும் தமிழக இளைஞர்களையும் பயன்படுத்திக் கொண்ட ரஜினிகாந்துக்கு இந்து மக்கள் கட்சி வன்மையாக கண்டனத்தை தெரிவித்துக் கொள்கிறது.

நன்றி: தட்ஸ்டாமில்.காம் வலைத்தளம்

450. தீவிரவாதம் கருக்கிய மலர்கள்

"அம்மா, எனக்கு தாகமா இருக்கு, கொஞ்சம் தண்ணி தாயேன்" என்றும், "அம்மா, ஏன் எனக்கு சாப்பிட ஒண்ணுமே தர மாட்டேன்கிற, பசிக்குது" என்றும், "அம்மா, என்னை அப்பாகிட்ட கூட்டிட்டுப் போயேன்" என்றும் நெருப்பில் இட்ட புழுவாக, யாஷ் என்கிற அந்த 9 வயது பாலகனின் வேதனை அலறல்,பார்ப்பவரின் நெஞ்சை உருக்குவதாக உள்ளது :( தனது கணவனை சமீபத்திய அகமதாபாத் குண்டு வெடிப்பில் பறி கொடுத்த (கீதா என்கிற) அந்தத் தாய், தன் மகனின் நிலையைக் கண்டு வெடித்து அழுவதைப் பார்க்கையில், 'கடவுள் என்று ஒருவர் இருக்கிறாரா' என்ற ஆதார சந்தேகம் வருகிறது :(

மேற்கூறிய காட்சி, அகமதாபாத் சிவில் மருத்துவமனையின் தீக்காய சிகிச்சைப் பிரிவில்! அதே மருத்துவமனை வாசலில் நிகழ்ந்த குண்டு வெடிப்பின் காரணமாக 50% தீக்காயங்களுடன் உயிருக்குப் போராடிக் கொண்டிருக்கும் யாஷுக்கு, டாக்டரின் அனுமதியின்றி ஒரு சொட்டுத் தண்ணீரோ, உணவோ தர இயலாத நிலையில் கீதா பரிதவிப்பது காணச் சகிக்காததாக இருக்கிறது. டிரிப் வழியாக குளுகோஸுடன் பல மருந்துகள் யாஷுக்கு ஏற்றப்பட்டுக் கொண்டிருக்கின்றன. யாஷின் அண்ணன் ரோஹன், அதே மருத்துவமனையில் 80% தீப்புண்களுடன் இன்னும் மோசமான நிலையில் இருக்கிறான்.

தீவிரவாதத் தாக்குதலின் கட்டுப்பாடற்ற, சிறிதளவும் மனிதநேயமற்ற குரூரத்தை, இந்த இரு குழந்தைகளின் அவல நிலையே காண்பவர், தெளிவாக உணர முடியும். அதே சிகிச்சைப் பிரிவில், உடல் முழுதும் வெள்ளைத் துணியால் சுற்றப்பட்டு வலியில் துடித்துக் கொண்டிருக்கும் சுனில் என்பவர், மிக்க மன உறுதியோடு, "என் வலியுடன் என்னால் போராட முடியும். ஆனால், எந்தத் தவறும் செய்யாத இக்குழந்தைகள் வேதனையில் துடிப்பதையும் அலறுவதையும் பார்க்கையில் என் இதயம் வெடித்து விடுவது போல இருக்கிறது!" என்று கூறுகிறார். மொத்த மருத்துவமனையும் அக்குழந்தைகளுக்காக பிரார்த்தித்துக் கொண்டிருக்கிறது.

அந்த சிவில் மருத்துவமனையின் வாசலில் அவரது இரு மகன்களுக்கு, தந்தையான வியாஸ் (அவர்களுக்காக வாங்கிய புது) சைக்கிள் ஓட்ட கற்றுக்கொடுத்துக் கொண்டிருந்தபோது தான், குண்டு வெடிப்பில் சிக்கி காயமடைந்தவர்களுடன் முதல் ஆம்புலன்ஸ் வண்டிகள் வரத் தொடங்கியிருந்தன. எமன் காத்துக் கொண்டிருந்தது தெரியாமல் அவர்களின் சைக்கிள் நேராக குண்டு வைக்கப்பட்டிருந்த காரை நோக்கி பயணித்தபோது, குண்டு வெடித்து, வியாஸ் சிதறடிக்கப்பட்டார். மற்றும் 11 பேர் (இதில் ஒரு டாக்டர் தம்பதியும் அடக்கம்!) பலியாயினர் :(

அடிபட்டவருக்கு உதவி செய்ய ஓடோ டி வந்த 20 வயது பவேஷ், மருத்துவமனை குண்டு வெடிப்பில் படு காயமடைந்து, அதே மருத்துவமனையில் போராடிக் கொண்டிருக்கிறார். குண்டு வெடிப்பில் அடிபட்ட பல நபர்களை மருத்துவமனைக்கு கூட்டி வந்த வினோத் என்கிற ஆட்டோ ஓட்டுனர் மருத்துவமனை குண்டு வெடிப்பில் சிக்கி, இரு கால்களும் செயலிழந்த நிலையில் பரிதாபமாக காட்சியளிக்கிறார் ! அந்த வேதனையிலும், "இனி கஷ்டத்தில் இருக்கும் யாருக்கும் என்னால் உதவ முடியாதே" என்று அரற்றுகிறார் :( What a senseless and mindless act of violence unleashed by these terrorists!

அகமதாபாத் தொடர் குண்டு வெடிப்புகளில் சிக்கியவர்கள் அங்கிருக்கும் 2 முக்கிய அரசு மருத்துவமனைகளுக்குத் தான் எடுத்து வரப்படுவார்கள் என்று சரியாக கணித்து, இந்த 2 மருத்துவமனைகளில் சரியான நேரத்தில் குண்டு வெடிக்குமாறு தீவிரவாதிகள் திட்டமிட்டுச் செய்துள்ளனர்.

ஈவு இரக்கமில்லாமல் அப்பாவிகளை வேட்டையாடும் இந்த தீவிரவாத அரக்கர்களை என்ன செய்தால் தகும் ?

எ.அ.பாலா

நன்றி: டைம்ஸ் ஆப் இந்தியா

449. புராதானச் சென்னையின் கட்டுப்பாடற்ற பேருந்துப் பயணங்கள்!

ஜே.எஸ்.ராகவன் என்பவர் எழுதி, சமீபத்தில் இந்தியன் எக்ஸ்பிரஸ் நாளிதழில் வெளியான இந்த "மலரும் நினைவுகள்" கட்டுரையை (இயன்றவரை நகைச்சுவைக்கு பங்கம் ஏற்படாதவாறு!) தமிழ்ப்படுத்தியிருக்கிறேன்.
********************
இரண்டாம் உலகப்போர் முடிவில், நிலக்கரிக்கு மாற்றாக பெட்ரோல் எரிபொருளாக பயன்படத் துவங்கிய காலத்தில், பூந்தமல்லிக்கும் பிராட்வேக்கும் இடையே, நெரிசல் இல்லாத சாலைகளில் பறந்த அந்த தனியார் பேருந்துகள் இன்னும் என் ஞாபகத்தில் உள்ளன. ஆங்கிலேயக் கொலையால் 'பூனமல்லே' என்று திரிந்த பூவிருந்தவல்லியைப் பற்றி பேசும்போது, அப்போது அங்கு அமோகமாக வளர்ந்த வெண்பனி நிற மல்லிப்பூவின் வாசம் (என்னையொத்த வயதானவர்களின்) நினைவில் வீசுவதை தவிர்க்க இயலாது!

அக்காலத்தில் பூந்தமல்லி டெர்மினஸில் பேருந்து புறப்படுவதை விசிலடித்து அறிவிக்க ஒரு நேரக் காப்பாளர் (Time Keeper) இருந்தார். ஆனால் ஓட்டுனரோ அவரது விசிலை கண்டு கொள்ளாமல், பேருந்தில் பயணிகள் ஓரளவு நிறைந்த பின்னர் தான் பேருந்தைத் துவக்குவது வழக்கம்! அப்பேருந்துகளின் நடத்துனர்கள் கவனத்தை ஈர்க்கும் வகையில் இருந்தனர்! சிலர் உருண்டையாகவும், சிலர் 'தொள தொளா' சட்டை / கால்சராயுடனும், இன்னும் சிலர் அழகாக நறுக்கப்பட்ட பென்சில் மீசையுடனும் பார்க்க காமெடியாக இருப்பர் :) அவர்களில் என்னைக் கவர்ந்தவர், வெண்மையான முகத்தில் இங்க் அடித்தது போல தெரியும் ஹிட்லர் மீசையுடன் காணப்பட்ட பழனி என்பவர்.

பெரும்பாலான பயணிகளுடன் பழனிக்கு நல்ல பழக்கம் இருந்ததால், அவர்கள் பட்டணம் செல்வது குறித்து ஒன்றிரண்டு வார்த்தைகள் பேசுவதை பழனி வழக்கமாகக் கொண்டிருந்தார். மவுண்ட் ரோடில் இருந்த ஹிக்கின்ஸ்பாதம் புத்தகக் கடைக்கு என்னுடன் பயணித்த எனது தந்தையாருக்கு, பழனியிடமிருந்து டிக்கெட் பெறுவதில் துளியும் தயக்கம் இருந்ததில்லை. காரணம்: நடத்துனர்களில் பழனி ஒருவர் தான் டிக்கெடைக் கிழிக்க விரலை எச்சில்படுத்துவதில்லை:)

செயிண்ட் தாமஸ் மவுண்டுக்கு அருகில் இருந்த பட் ரோடு நிறுத்தம் வந்தவுடன், நான் எனது கண்களையும், காதுகளையும் கூராக்கிக் கொள்வேன்! அக்காலத்தில், அவ்விடம் ஒரு குட்டி லண்டன் போல இருந்தது. வட்டமான தொப்பி அணிந்த ஆங்கிலேயக் கனவான்களுடன், கால்கள் தெரியும் விதத்தில் வண்ண வண்ண ஸ்கர்ட் அணிந்த வெள்ளை நிற பெண்மணிகள், அந்த நிறுத்ததிதில் தான் பேருந்தில் ஏறுவர்!

அந்த வெள்ளைக்கார ஜோடிகள் கை கோர்த்தபடி இருப்பர். இந்த கை கோர்த்தல், பொது இடத்தில் செய்யத்தகாத காரியமாக கல்யாணமான இந்தியர்கள் நினைத்த காலம் அது ! சில கனவான்களிடம் பீர் வாசனை அடிக்கும். வெள்ளைக்கார நங்கைகளோ வாசனை திரவிய தொழிற்சாலை போல கமகமவென்று வருவார்கள் !

பட்டணத்திலிருந்து பூந்தமல்லியை நோக்கி ஒரு இரவுப் பயணத்தின்போது, பார்க்க குளிரில் நடுங்கும் எலி போல காணப்பட்ட முனிசிபல் நீதிமன்ற பத்திர வியாபாரி என்னருகில் அமர்ந்திருந்தார். பேருந்து ஓடத் துவங்கியவுடன், அவரது தலை பக்கத்தில் இருப்பவர் தோளில் சாய்ந்து விடுவது என்பது பொதுவாக நடக்கும் விஷயம் தான், குறட்டையும் உண்டு :)

அக்கால பேருந்துகளில், இருவர் அமரக்கூடிய இருக்கைக்கு நேர் எதிரே இன்னும் இருவர் அமரும் விதமாக, இருக்கை அமைப்பு இருந்தது. எங்கள் இருக்கைக்கு எதிரே, கோட் சூட் அணிந்த ஓர் ஆங்கிலக் கனவானும், நீண்ட கால்கள் கொண்ட சிற்பம் போல இருந்த அவரது மனைவியும் அமர்ந்திருந்தனர். சாலையில் ஒரு மூதாட்டி முக்தி அடைவதை தடுக்கும் பொருட்டு, பேருந்து ஓட்டுனர் ஓர் அவசர பிரேக் அடித்ததில், என்னருகில் தூங்கிக் கொண்டிருந்த பத்திர வியாபாரி, வில்லிலிருந்து புறப்பட்ட அம்பைப் போல, அவ்வெள்ளைக்கார பெண்மணியின் தாராள மடியில் தஞ்சம் அடைந்தார் :)

நிலைமையை உணர்ந்த வியாபாரி, 'சாரி மேடம், சாரி மேடம்' என்பதை, ஏதோ ஒரு பிராயசித்த மந்திரத்தை ஜெபிப்பது போல் பல தடவை உச்சரித்தார்! "முதலில் எழுந்திரு மேன், அப்புறம் மன்னிப்பு கேளு" என்று கூறியபடி, அந்த ஆங்கிலேயப் பெண்மணி தனது மடியிலிருந்த வியாபாரியின் தலையை, ஒரு வீங்கிய பெருச்சாளியை அப்புறப்படுத்துவது போல, தனது இடது கையால் விலக்கித் தள்ளினார் ! பிறகு அப்பெண்மணி தனது ஸ்கர்ட்டை சரி செய்து கொண்டபோது, பழனி சிரிப்பை அடக்கிக் கொண்டு என்னைப் பார்த்து கண்ணடித்தார் :)

ஒரு மழைக்கால இரவில் கடைசிப்பேருந்தில் நானும் என் தந்தையாரும் பட்டணத்திலிருந்து பூந்தமல்லியில் உள்ள எங்கள் வீட்டுக்குத் திரும்பிக் கொண்டிருந்தோம். தந்தையார் தூங்கி விட்டிருந்தார். 'பேருந்து நிறுத்தத்திலிருந்து வீட்டை அடைவதற்குள் ஹிக்கின்பாதம்ஸ் கடையில் வாங்கிய புத்தகங்கள் அத்தனையும் மழையில் நனைந்து விடுமே, என்ன செய்வது?' என்று நான் யோசித்துக் கொண்டிருந்தபோது, பேருந்து மெல்ல நின்றது. வெளியே மழை கொட்டிக் கொண்டிருந்தது! எனது தந்தையாரை எழுப்பிய பழனி, நாங்கள் இறங்க வேண்டிய இடம் வந்து விட்டதைத் தெரிவித்தார்.

சாலையில் என் பாதம் பட்டவுடன் தான் கவனித்தேன், எங்கள் வீட்டு வாசலிலேயே நாங்கள் இறக்கி விடப்பட்ட விஷயத்தை !!!

எ.அ.பாலா

நன்றி: இந்தியன் எக்ஸ்பிரஸ்

448. ரங்கராஜன் நம்பி - My 2 cents!

எனது முந்தைய பதிவில் அம்முவின் விமர்சனத்தின் தொடர்ச்சியாக, எனது சின்ன மகளிடம் (6 வயது), 'படம் பிடித்ததா?' என்று கேட்டேன். அவள், "படத்தில 2 கமல் தானே ... சயிண்டிஸ்ட் கமல், கோயில்ல சண்டை போடற கமல் .. வராங்க, மீதி கமல் எல்லாம் எங்கே போனாங்க?" என்று ஒரு சூப்பர் கேள்வி கேட்டாள் :) நான் மற்ற 8 வேடங்களில் கமல் வருவது பற்றி விவரித்தபோது, "மத்த கமல் எல்லாம் பார்க்க ஏம்பா கார்ட்டூன் மாதிரி இருக்காங்க?" என்று இன்னொரு கேள்வி கேட்கவே, நான் அப்பீட் :)

My 2 cents: இணையத்தில் பலவகையான விமர்சனங்களை வாசித்து விட்டதால், உலகத்தரமான படத்தை எல்லாம் எதிர்பார்த்துச் செல்லவில்லை என்ற டிஸ்கியோடு தொடங்குகிறேன்! தசா ஒரு நல்ல மசாலா படம் என்று நிச்சயம் கூறமுடியும். Real Good Entertainer ! "சிவாஜி" பெட்டரா, "தசா" பெட்டரா என்று (ரஜினி ரசிகனான) என்னிடம் கேட்டால், என் பதில் ... No comments;) இதே படம், ஹாலிவுட்டில் எடுக்கப்பட்ட ஓர் ஆங்கிலப் படமாக இருந்திருந்தால், அதன் concept மற்றும் 10 வேடங்களுக்கு சிலாகிக்கப்பட்டிருக்கும், நமது அடிமை மெண்டாலிட்டி அப்படிப்பட்டது :(

பிரம்மாண்டத்தை பிரம்மாண்டத்துடன் ஒப்பிட வேண்டும்! அந்த வகையில் சங்கரின் பல குப்பைகளை (சிவாஜி, இந்தியன் தவிர!) விட, தசா பரவாயில்லை என்று தான் கூறுவேன். இப்படி ஒப்பிடுவதை விடுத்து, சுப்ரமணியபுரத்துடனும், பருத்தி வீரனுடனும் ஒப்பிடுவது சரியான அணுகுமுறை கிடையாது! கமலின் சிறந்த நடிப்பைப் பார்க்க பலப்பல உத்தமமான படங்கள் (ராஜபார்வை, மூன்றாம் பிறை, நாயகன், ஹேராம், தேவர் மகன், குணா, குருதிப்புனல், மகாநதி, தெனாலி, அன்பே சிவம் ...) நமக்காக காத்திருக்கின்றன. மேலும், இந்தப் படத்திற்கு இவ்வளவு பணத்தைக் கொட்டியிருக்க வேண்டுமா போன்ற கேள்விகளுக்குள் செல்வதில் எந்த அர்த்தமும் இருப்பதாகத் தோன்றவில்லை!

கமலின் நடிப்பு, குறிப்பாக பல்ராம் மற்றும் வின்செண்ட் வேடங்களில் சூப்பர். வின்செண்ட் பாத்திரப் படைப்பில் ஒரு எழவு (நுண்)அரசியலும் இருப்பதாகத் தோன்றவில்லை! பத்து வேடங்களும் வித்தியாசமாகத் தெரிய வேண்டும் என்பதற்காக, மேக்கப் சற்று அத்து மீறியதில், ஒரு வித 'ஒட்ட வைத்த' செயற்கைத்தனம் இருந்தது உண்மை தான் என்றாலும், பாத்திரத்திற்கு ஏற்ற பேச்சு வழக்கை அனுசரிப்பதில் கமலுக்கு இணை யாரும் கிடையாது. ஒன்றுமே இல்லாத புஷ் வேடத்தில் கூட , புஷ்ஷின் சின்னச்சின்ன மேனரிஸங்களை வெளிக் கொணர்ந்ததில், கமலின் நுண்ணிய கவனமும், உழைப்பும் தெரிகிறது.

ஒப்பனையும், தொழில்நுட்பமும் வளராத காலகட்டத்தில், தனது நடிப்பால் மட்டுமே 9 வேடங்களிலும் வித்தியாசம் காட்டிய 'நவராத்திரி' சிவாஜி, ஞாபகத்திற்கு வந்தது என்னவோ உண்மை தான்! அது போலவே, கமல் தானே பத்து வேடங்களிலும் நடிக்காமல், சிலவற்றை தாரை வார்த்துக் கொடுத்திருந்தால், இவ்வளவு கடுமையான விமர்சனங்கள் வந்திருக்காது என்று நினைக்கிறேன்.

தசாவின் 12-ஆம் நூற்றாண்டுக் காட்சிகளின் பிரம்மாண்டம், ஆங்கிலப்படங்களுக்கு இணையானது. கமல் நாத்திகராக இருந்தாலும், தசாவின் பத்து வேடங்களில் ரங்கராஜன் நம்பி என்ற ஆத்திக வைணவர் வேடம் தான் அவருக்கு சிறப்பாகப் பொருந்துகிறது :) சாரு தனது விமர்சனத்தில், கோயிலில் இறைசேவை செய்யும் வைணவர் இப்படித்தான் புஜ பராக்கிரமத்துடன் இருந்திருப்பாரா என்று சந்தேகப்படுவது போல் படாமல் இருந்தால், அக்காட்சிகளை ரசிக்க முடியும்! பக்தி உணர்வு உள்ளவர்களுக்கு சிலிர்ப்பு தரும் காட்சிகள் அவை. கமல் "சாந்தாகாரம், புஜகசயனம் ..." என்று சொல்லும்போது எனக்கு மெய் சிலிர்த்தது!

வைணவத்தில், பரந்தாமனின் அடியாரைப் பணிவது, பரமனைப் பணிவதைக் காட்டிலும் உயர்ந்ததாகக் கூறப்படுகிறது! அந்த சிறிய விஷயத்தைக் கூட கவனத்தில் கொண்டு, ரங்கராஜ நம்பியை மூலவர் சிலையுடன் கட்டி கடலுக்கு இட்டுச் செல்லும்போது, பல்லாண்டு பாடும் வைணவர்கள், ஒருவர் தோள் மேல் ஒருவர் ஏறி, (மூலவரின் திருவடியைப் பற்றி வணங்காமல்!) ரங்கராஜன் நம்பியின் திருவடியைப் பற்றி வணங்குவதை காட்சியில் கொணர்ந்திருக்கும் செயல் வியப்பை வரவழைத்தது!

அதே சமயம், கேயாஸ் தியரி, பட்டர்ஃபிளை எஃபெக்ட் பற்றியெல்லாம சிந்திக்கக் கூட தமிழ் சினிமாவில் ஆள் இருக்கிறாரே என்று சாரு போலவெல்லாம என்னால் சிலாகிக்க முடியவில்லை;-)

தமிழ் கூறும் நல்லுலகில் உலவும் அறிவுஜீவிகள், கமர்ஷியலாக தோல்வி அடையும் படங்களை மட்டுமே "நல்ல" படங்கள் என்று ஒத்துக் கொள்வது, சிலாகித்துப் பேசுவதும் ஏன் என்று புரியவில்லை! கமர்ஷியலாக வெற்றி அடையும் திரைப்படங்களில் எந்த வகையிலும் நடிப்புக்கு scope-ஏ கிடையாது என்று மறுத்துப் பேசுவது சரியாகாது.

தசாவை தமிழ் சினிமாவின் மைல்கல் என்றெல்லாம் கூற மாட்டேன்! அதே நேரத்தில், தசா போன்ற திரைப்படங்களால் தமிழ் சினிமாவுக்கு பின்னடைவு / ஆபத்து என்று நண்பர் சுரேஷ் கண்ணனுக்கு இணையாக கெட்டிக்காரத்தனமாக வாதாட எனக்கு சரக்கு போதாது :)

எ.அ.பாலா